Böyük Azərbaycan Partiyası

BÖYÜK AZƏRBAYCAN PARTİYASININ PROQRAMI

BÖYÜK AZƏRBAYCAN PARTİYASININ PROQRAMI

(II REDAKSİYADA)

Böyük Azərbaycan Partiyasının

25.11.2023 tarixli növbədənkənar VII qurultayının qərarı ilə təsdiq edilmişdir.

1. Partiyanın inkişafı və uğurları

Böyük Azərbaycan Partiyası 11.05.2003-cü ildə təsis olunmuş və 12.08.2005-ci ildə qeydiyyatdan keçmişdir. Partiyanın ötən dövr ərzində keçdiyi yola nəzər salsaq, onun qarşısına qoyduğu məqsəd və vəzifələri böyük məsuliyyətlə, layiqincə yerinə yetirdiyinin, respublikamızda demokratik siyasi sistemin və vətəndaş cəmiyyətinin yaranmasına verdiyi töhfənin şahidi oluruq.

Azərbaycan Respublikasının qanunvericiliyi, özünün Nizamnaməsi və Proqramı əsasında fəaliyyət göstərən BAP ideoloji yönümünə görə mərkəz sağ partiyasıdır.

Azərbaycan XXI əsrə müstəqil, lakin ərazilərinin xeyli hissəsi işğal altında, sosial-iqtisadi çətinliklər, siyasi qütbləşmənin dərinləşməsi şəraitində daxil oldu.

Müstəqillik qazandıqdan sonra demokratiyanın əlamətləri hiss olunsa da, demokratik vətəndaş cəmiyyətinin, hüquqi dövlət quruculuğunun bərqərar olması üçün çoxlu səylər göstərilməsinə ciddi ehtiyac duyulurdu. Ən əsas vəzifə isə ölkəmizin ərazi bütövlüyünün təmin olunması, müstəqilliyimizə və suverenliyimizə qarşı təcavüz cəhdlərinə son qoyulması idi. Biz dövlət olaraq 44 günlük Qarabağ müharibəsində və sonra keçirilən anti-terror tədbirləri nəticəsində ölkəmizin ərazi bütövlüyünü təmin etdik. Qarabağ işğaldan azad olundu.

Bizim düşüncəmizə görə, ərazi bütövlüyünü təmin edən, müstəqilliyi üçün hər hansı təhlükəyə imkan verməyən, inkişaf etmiş dövlətçiliyi, iqtisadiyyatı, ordusu və ədalətli cəmiyyəti olan, vətəndaşlarına sərbəst seçim imkanı verən, əhalinin aztəminatlı hissəsini, elm, təhsil, səhiyyə, mədəniyyət və idmanı himayəsinə götürərək inkişaf etdirən, dilini, dinini, adət-ənənələrini qoruyan, milli qüruru yüksəklərə qaldıraraq beynəlxalq aləmdə sayılan və qəbul olunan dövlət Böyük dövlətdir.

Böyük Azərbaycan Partiyası olaraq Azərbaycanı Böyük dövlət kimi görmək istəyirik.

Bunun üçün hər bir fərd Azərbaycanı düşdüyü böhrandan məhz onun xilas edəcəyi amalı ilə yaşamalı və çalışmalı, dövlət isə hər vətəndaşına eyni qaydada qayğı göstərməlidir.

Hüquqi dövlətin əsas prinsiplərindən olan qanunun aliliyi, hakimiyyət bölgüsü, vətəndaşların tutduğu mövqedən asılı olmayaraq qanun qarşısında bərabərliyi təmin olunduqda, yüksək intellektual potensiala və yeni düşüncə tərzinə malik, enerjili, təmiz insanlar hakimiyyətdə təmsil olunduqda, islahatlar düzgün istiqamətdə aparıldıqda, sosial ədalət prinsipi qorunduqda, bütün vətəndaşlara öz bacarığını ortaya qoymaq imkanı yaradıldıqda dövlətçiliyin təməli möhkəm olur. Böyük Azərbaycan Partiyasının mübarizəsi bu yöndədir.

Belə hesab edirik ki, hər hansı dövlətin böyüklüyünü yalnız onun ərazisinin genişliyinə görə götürmək düzgün olmazdı.

Böyük Azərbaycan Partiyası öz fəaliyyətini Azərbaycan Respublikasının qanunları və beynəlxalq hüquq normaları çərçivəsində həyata keçirəcəkdir.

Əminik ki, qarşıdakı dövrdə də BAP cəmiyyətin əsas siyasi qüvvələrindən biri kimi Azərbaycanın çiçəklənməsi, onun dünya birliyində mövqeyinin möhkəmlənməsi, xalqımızın xoşbəxt və firavan həyat şəraitində yaşaması yolunda böyük qətiyyət və əzmkarlıqla fəaliyyət göstərəcəkdir.

Biz Böyük Azərbaycan quracağıq!

1. Siyasi dəyərlər və prinsiplər

1.1 Müstəqillik

Dövlət müstəqilliyi:

  • ali dəyər kimi xalqımızın maraqlarının reallaşması üçün geniş imkanlar yaratmaq;

  • Azərbaycanın xarici ölkələrlə bərabərhüquqlu qarşılıqlı münasibətlər qurmasını təmin etmək;

  • daxili və xarici təhdidlərə qarşı xalq-dövlət birliyini möhkəmləndirmək;

  • “hakimiyyətin mənbəyi xalqdır” prinsipini əsas tutaraq, demokratik institutlar yaratmaq, vətəndaş cəmiyyəti təsisatlarını gücləndirmək;

  • ictimai-siyasi sabitliyin davamlılığını təmin etmək;

  • ölkəmizin hərbi təhlükəsizliyini təmin etməyə qadir olan Azərbaycan Silahlı Qüvvələrini daha da gücləndirmək;

  • iqtisadi islahatların aparılması yolu ilə güclü iqtisadi inkişafa nail olmaq;

  • ölkədə milli təhsil və səhiyyə sahəsində əsaslı islahatlarla qabaqcıl təhsil və səhiyyə sisteminə nail olmaq.

1.2. Azərbaycançılıq

Azərbaycan – dilindən, dinindən, milli mənsubiyyətindən asılı olmayaraq hər bir Azərbaycan vətəndaşının, onu özünə vətən bilən hər bir soydaşımızın vətənidir.

Azərbaycanda yaşayan bütün toplumlara qayğı göstərilməsi, dünya azərbaycanlıları ilə əlaqələrin gücləndirilməsi, vətənpərvərlik hissinin aşılanması, Azərbaycan dövlətinin harada yaşamasından asılı olmayaraq bütün soydaşlarımıza dəstəyin təmin olunması və hər bir azərbaycanlının Vətəninin mənafeyini hər şeydən üstün tutması nəticəsində Azərbaycanı qüdrətli bir ölkəyə çevirəcəkdir.

Azərbaycançılıq məfkurəsi xalqımızın çoxəsrlik mədəni irsinin hərtərəfli şəkildə, dərindən öyrənilməsində və gənc nəslin vətənpərvərlik ruhunda tərbiyə olunmasında mühüm yer tutur.

Azərbaycançılıq məfkurəsi partiyanın əsas prinsiplərindən biri kimi:

  • xalqımızın milli həmrəyliyini və birliyini təmin edir;

  • milli-mədəni irsi və mənəvi-əxlaqi dəyərləri qoruyaraq zənginləşdirir;

  • ölkəmizdə yaşayan müxtəlif millətlərin və dinlərin nümayəndələrini öz ətrafında birləşdirir;

  • xarici ölkələrdə yaşayan azərbaycanlıların həmrəyliyində və təşkilatlanmasında xüsusi yer tutur;

  • ümummilli ideologiya kimi siyasi münasibətlərin fövqündə dayanır;

1.3. Dövlətçilik

Dövlətin mövcudluğu müəyyən sərhədlər və iqtisadi-coğrafi amillərlə bağlı olmaqla yanaşı, eyni zamanda tarixi ənənələrə söykənir. Mürəkkəb geostrateji məkanda yerləşən Azərbaycanın torpaqları tarixən vaxtaşırı işğalçıların hücumlarına məruz qalsa da, xalqımız həmişə dövlətçilik ənənələrini qoruyub saxlamağı bacarıb.

Azərbaycan xalqının ictimai-siyasi fikir tarixində, milli mənlik şüurunda dövlətçiliklə bağlı sabit mənəvi dəyərlər formalaşıb. Dövlətçilik tarixi-ictimai təşkilatlanmanın və mədəniyyətin ən yüksək formasıdır. Müstəqil dövlətçiliyin qorunması yolunda varislik, vətənpərvərlik, fədakarlıq və əzmkarlıq göstərmək BAP-ın fəaliyyətində xüsusi yer tutur. Buna görə də partiya:

  • Azərbaycan dövlətin inkişafında xalqın iradəsini əsas götürməyi;

  • ölkənin maddi və intellektual potensialına əsaslanmaqla hüquqi dövləti və vətəndaş cəmiyyətini möhkəmləndirməyi;

  • siyasi-tarixi ənənələri inkişaf etdirərək, müstəqil dövlətçiliyin qorunmasını və dövlət maraqlarının öncüllüyünü əsas prinsiplər olaraq hesab edir.

İstiqlalımızın qorunması, ərazilərimizin toxunulmazlığının təmin olunması, ölkənin ədalətlə idarə olunması – güclü və demokratik dövlətçilik tələb edir.

Dövlət – bütün cəmiyyətin kütləvi siyasi hakimiyyəti olduğundan, vətəndaşlar qarşısında vəzifə qoymaqla həm də onların hüquqlarının təminatçısı olmalıdır.

1.4. Qanunun aliliyi (Qanunçuluq)

Azərbaycanda mövcud problemlərin aradan qaldırılması üçün əsas şərtlərdən biri – mükəmməl qanunvericilik bazasının yaradılması, qanunların icra mexanizminin hazırlanması, qanun qarşısında hamının bərabərliyinin təmin olunmasıdır.

Qanunun aliliyi, hakimiyyət bölgüsü, tutduğu vəzifədən asılı olmayaraq bütün vətəndaşların qanunlara ciddi riayət etməsi demokratik vətəndaş cəmiyyətinin bərqərar olmasını təmin edir.

Hakimiyyətin qanunverici, icra və məhkəmə qollarına bölünməsi, onlar arasında bir-birini tamamlayan qarşılıqlı münasibətlər hüquqi, demokratik dövlətin əsasını təşkil edir.

BAP-ın əsas prinsiplərindən biri olan qanunun aliliyi şəraitində:

  • vətəndaşların hüquq və azadlıqları təmin olunur;

  • ictimai münasibətlər demokratik normalar əsasında inkişaf edir;

  • hər kəs ümummilli maraqları rəhbər tutaraq, siyasi, iqtisadi, hüquqi, ictimai normalara tabe olur və qanunlara riayət edir.

1.5. Milliyyətçilik

Hər millət başqalarının mənafeyinə hörmətlə yanaşaraq, öz mənafeyini qorumaq hüququna malikdir.

Ölkədə yaşayan millətlərin bir-birinə tarixi-coğrafi, qohumluq, vətəndaşlıq telləri ilə bağlılığını aşılamaqla milli vəhdətə nail olunur.

1.6. İstiqlalçılıq

Dövlətin gələcəyi onun istiqlalı ilə bilavasitə bağlıdır. Azad olmayan xalq kölə kimi yaşamaq məcburiyyətində qalır.

İstiqlalımızın qorunub saxlanması onun qazanılması qədər çətindir. Bunun üçün dövlətçiliyin möhkəmləndirilməsi, iqtisadi tərəqqi, vətəndaşların öz dövlətinə və iqtidarına inamı vacib şərtlərdəndir.

1.7. Hürriyyətçilik

Hər bir fərdin azad olması, onun hüquqlarının qorunması, hər bir insanın öz istəyinə uyğun həyatını qurması, fəaliyyət göstərməsi və öz imkanlarını gerçəkləşdirməsi təmin olunduqda, azad vətəndaşın – azad cəmiyyətdə yaşamaq imkanı reallaşır.

1.8. Sosial ədalət və insan amili

BAP-ın sosial siyasət sahəsində məqsədi insana qayğı, onun inkişafı, maddi və mənəvi tələbatlarının ödənilməsi üçün zəruri şəraitin yaradılması, sosial ədalət prinsipinin daim qorunması və müxtəlif sosial qruplar arasında kəskin təbəqələşmənin qarşısının alınmasından ibarətdir.

Sosial dövlət prinsiplərinə sadiq olan ölkələrdə dövlət vergi, sosial və məqsədli yardım mexanizmləri yaradaraq, cəmiyyətin aztəminatlı təbəqəsinin yaşayışı üçün minimum həyat şəraitinin təmin olunmasını təşkil edir. Belə cəmiyyətlərdə ictimai sabitliyə nail olmaq, humanizm və ədalət prinsiplərini qorumaq dövlətin siyasi fəaliyyətinin əsas istiqamətlərindəndir. Azərbaycanda da insan amilinə diqqət göstərilməsi dövlət siyasətinin sosial yönümlülüyünü müəyyən etməlidir.

BAP sosial ədalət və insan amili prinsipindən çıxış edərək aşağıdakıları öz fəaliyyətinin əsas istiqamətlərindən biri hesab edir:

  • dövlətin sosial yönümlü siyasətinin sosial ədalət prinsipinə söykənməsi;

  • hər kəsin məşğulluğunun təmin edilməsi, ərzağa əlçatanlığa və sosial müdafiə imkanına malik olması;

  • vətəndaşların sosial hüquqlarının təmin olunması üçün əlverişli şəraitin yaradılması;

  • kəmiyyət, keyfiyyət, məhsuldarlıq və iqtisadi imkanlar nəzərə alınmaqla əməyə görə mükafatlandırma;

  • uşaqlara, ağıllara, əlilliyi olan şəxslərə, aztəminatlı ailələrə, şəhidlərin ailə üzvlərinə və müharibə veteranlarına diqqət və qayğı göstərilməsi.

1.9. Demokratik ənənələrin inkişafı

BAP dövlətin idarə olunmasında və partiyadaxili fəaliyyətin təşkilində demokratik prinsipləri əsas götürür, siyasətdə açıq və peşəkar münasibətlərin tərəfdarı kimi çıxış edir.

Azərbaycan xalqının hakimiyyətin yeganə mənbəyi olması, seçkili orqanlara seçkilərin ümumi, bərabər və birbaşa seçki hüququ əsasında sərbəst, gizli və şəxsi səsvermə yolu ilə keçirilməsi, əsas insan və vətəndaş hüquq və azadlıqlarının qorunması ölkəmizin demokratik siyasi sisteminin əsasını təşkil etməlidir.

Plüralizm, hakimiyyətlərin bölünməsi, insanların azadlığı və bərabərliyi, ictimai rəyin nəzərə alınması, qanunların aliliyinə riayət olunması BAP-ın fəaliyyətinin siyasi əsaslarıdır.

Demokratik ənənələrin möhkəmlənməsində hüquqi dövlətin və vətəndaş cəmiyyətinin inkişafı mühüm rol oynayır. Demokratik dəyərlərə yiyələnmək və ona bağlı qalmaq Azərbaycanın siyasi sisteminin inkişafını təmin edən meyarlardan biri olmalıdır.

BAP-ın mövqeyinə görə, demokratik siyasi münasibətlər dövlətin mütərəqqi yolla inkişafını şərtləndirən vacib amildir. Buna görə də partiya demokratik ənənələrə mühüm siyasi dəyər kimi yanaşır və onları möhkəmləndirməyi əsas məqsədlərindən biri hesab edir.

2. Partiyadaxili münasibətlərin və partiyanın fəaliyyətinin əsasları

2.1. Peşəkarlıq

İctimai-siyasi sahədə peşəkarlıq amili özünün aktuallığı ilə seçilir və cəmiyyətdə gedən proseslərə yaradıcı, kreativ yanaşmanı şərtləndirir. Sağlam rəqabət mühiti siyasi münasibətlərdə iştirak edən tərəflərdən yüksək siyasi peşəkarlıq tələb edir.

Peşəkarlıq qarşıya qoyulmuş hədəflərə nail olmaq üçün hadisə və proseslərin mahiyyətinin obyektiv qiymətləndirilməsini, təhlilini nəzərdə tutur. Müasir dövrün çağırışları, elmi-texniki yeniliklər, informasiya cəmiyyətinin tələbləri ictimai münasibətlərin inkişaf səviyyəsi peşəkarlığın fəaliyyət meyarı kimi əhəmiyyətini artırır.

BAP partiyanın üzvləri arasında əlaqələrin peşəkarlıq meyarına əsaslanaraq inkişafını təşviq edir.

2.2. İşgüzar münasibətlər

Siyasi idarəetmə proseslərinə cəlb olunmuş insanlar arasında işgüzar münasibətlərin dəstəklənməsi, eyni zamanda, fəaliyyətin rasionallıq və adekvatlıq dərəcəsinə də müsbət təsir etməkdədir. İşgüzar münasibətlər partiyanın üzvləri arasında razılığa və konstruktiv əməkdaşlığa nail olmaq vasitəsidir.

BAP öz üzvlərinin şəxsi keyfiyyət və işgüzar münasibətlərinə böyük əhəmiyyət verir. Partiyadaxili işgüzar münasibətlər qarşıya qoyulmuş məqsədlərə nail olmaq üçün çeviklik və səmərəlilik yaradır.

BAP-da sağlam mənəvi-psixoloji mühitin inkişafı, həmçinin münbit iş şəraitinin yaradılması məqsədilə partiya üzvləri arasında işgüzar münasibətləri möhkəmləndirmək fəaliyyətimizin əsaslarından biridir.

2.3. Şəxsi inkişaf

Müasir cəmiyyətdə fərdlərin inkişafını təmin edən və səmərəli təhsilin məhsulu olan şəxsi inkişaf BAP-ın partiyadaxili münasibətlərində xüsusi yer tutur.

Şəxsi inkişaf özünütənqidə, çatışmazlıqların müəyyənləşməsinə və qarşıya qoyulan hədəflərə nail olmağa xidmət edir. BAP tənqidi təfəkkürü, komandada işləməyi, kollektivçilik və qarşılıqlı fəaliyyəti, ünsiyyət bacarığını önə çəkməklə, şəxsi inkişafı fəaliyyət meyarı kimi öz üzvləri arasında təşviq etməklə, onların siyasi-intellektual hazırlıq səviyyəsini yüksəldir.

Partiyanın üzvü olan hər bir insan şəxsi inkişafını düşünərkən vətəndaşlıq məsuliyyətini dərk etməli və ictimai həyatda fəallıq göstərməlidir.

2.4. Sağlam rəqabət

Demokratik cəmiyyətin inkişafının əsas xüsusiyyətlərindən biri sağlam rəqabət mühitinin mövcud olmasıdır. BAP bunu nəzərə alaraq partiyadaxili münasibətlərdə sağlam rəqabəti, səmimiyyəti, qarşılıqlı hörməti, demokratik mühiti, şəxsi bacarıq və təşəbbüskarlığı təşviq edir.

Sağlam rəqabət mühiti partiya üzvlərində demokratik düşüncə tərzini möhkəmləndirir, partiya idarəçiliyində çeviklik və qarşıya qoyulmuş vəzifələrin uğurla yerinə yetirilməsi üçün əlverişli şərait yaradır.

2.5. Etik davranış və milli dəyərlər

Partiya üzvlərinin fəaliyyəti bütün hallarda hər bir şəxs üçün vicdanlılıq nümunəsi olmalıdır. Onlar bütün şəxslərə, o cümlədən işlədikləri kollektivdə rəhbərliyə və yaxud tabeliyində olan insanlara münasibətdə etik davranış qaydalarına riayət etməlidirlər.

Hər bir xalqın və millətin inkişafında onun milli adət-ənənələrinə, mədəniyyətinə, ədəbiyyatına, tarixinə bağlılıq dərəcəsi mühüm rol oynayır. Buna görə də BAP milli dəyərlərin qorunmasına və təbliğinə xüsusi diqqət yetirir, müxtəlif mədəniyyətlərin daşıyıcısı olan partiya üzvləri arasında etik davranışı və tolerantlığı təşviq edir.

2.6. İnnovativ inkişaf və kreativlik

Yaradıcı təfəkkür, kreativ düşüncə, təşəbbüskarlıq və innovativ inkişaf müasir dünyada peşəkar fəaliyyətin meyarıdır. Səmərəlilik, rasionallıq, çeviklik, müasirlik və aktuallıqla səciyyələnən kreativ yanaşma siyasi münasibətlərə də sirayət edir.

Müasir dövrdə rəqəmsal texnologiyaların müxtəlif sahələrdə, o cümlədən siyasətdə tətbiqi artmaqdadır. Dünyada sürətlə gedən rəqəmsal transformasiya prosesləri və inkişaf edən “rəqəmsal cəmiyyət” formasiyası konkret sahələr üzrə tədricən yeni fəaliyyət qaydaları yaradacaqdır.

BAP-ın fəaliyyətinin əsaslarından biri də innovativ inkişaf və kreativliyin təşviqi və geniş tətbiqinin dəstəklənməsidir.

2.7. Müasirlik

Partiya hər zaman cəmiyyətdə yeniliyin və müasirliyin tərəfdarı, təşəbbüskarı kimi çıxış edir. Müasirlik ictimai inkişafı səciyyələndirən əsas xüsusiyyətlərdəndir. Azərbaycan dövləti xalqımızın tarixi adət-ənənələrini və mənəvi-əxlaqi dəyərlərini qorumaqla yanaşı, modernləşmə yolu ilə inkişaf etməlidir. Müasirlik milli dəyərlərin hər hansı şəkildə aşınmasına səbəb olmamalıdır.

Azərbaycan xalqının maraqlarına cavab verən və mütərəqqi xarakter daşıyan müasir dəyərlərdən bəhrələnmək BAP-ın fəaliyyətinin əsaslarından biridir. Ümummilli dəyərlərlə bəşəri dəyərlərin vəhdəti və əlaqələndirilməsi müasir şəraitdə mühüm yer tutur. Bununla yanaşı, partiya digər siyasi təşkilatlarla və vətəndaş cəmiyyəti institutları ilə əməkdaşlığın müasir, mütərəqqi prinsiplər əsasında möhkəmlənməsinə üstünlük verir.

3. Böyük Azərbaycan Partiyasının əsas hədəfləri (vəzifələri)

Qəbul etdiyi prinsiplərə əsasən Böyük Azərbaycan Partiyasının qarşıya qoyduğu hədəflər (vəzifələr) aşağıdakılardır:

3.1. Siyasi quruculuq sahəsində

  • Dövlətimizin müstəqilliyinin və suverenliyinin qorunması, demokratik seçki sisteminin yaradılması və demokratik yolla hakimiyyətə gəlmə;

  • hüquqi dövlətin əsas prinsiplərindən olan qanunun aliliyinin, hakimiyyət bölgüsünün, vətəndaşların tutduğu mövqedən asılı olmayaraq qanun qarşısında bərabərliyinin təmin olunması;

  • insan hüquq və azadlıqlarının təmin olunması, vətəndaşlara sərbəst seçim imkanının verilməsi;

  • demokratiyanın, söz azadlığının qorunması.

3.2. İqtisadi sahədə

BAP davamlı iqtisadi inkişafın vətəndaşların həyatına təsir göstərən başlıca amillərdən biri olduğunu nəzərə alaraq:

  • iqtisadiyyatda köklü islahatların, normal bazar iqtisadiyyatı siyasətinin aparılması;

  • mülkiyyət formalarının bərabərhüquqlu zəmində, xüsusi mülkiyyətin toxunulmazlığı üçün dövlət təminatının yaradılması, rəqabət azadlığı;

  • insanların sərbəst sahibkarlıq fəaliyyəti ilə məşğul olmalarına şərait yaradılması, xırda sahibkarlığa dövlət qayğısının təmin olunması;

  • yerli sahibkarlar təbəqəsinin inkişafı üçün dövlət himayəsinin yaradılması;

  • korrupsiyanın və rüşvətxorluğun aradan qaldırılması üçün sərt tədbirlərin görülməsi;

  • vergilərin sadələşdirilməsi və yüngülləşdirilməsi yolu ilə vergi ödəyicilərinin sayının artırılması;

  • istehsalın inkişafına şərait yaradılması, yeni iş yerlərinin açılması və işsizliyin aradan qaldırılması.

3.2.1. Makroiqtisadi sabitlik və yüksək iqtisadi artım sahəsində

  • dayanıqlı və sürətli iqtisadi artım vasitəsilə ölkədə adambaşına düşən milli gəlirin davamlı artmasına nail olunması;

  • makroiqtisadi sabitliyin qorunması, inflyasiyanın qarşısının alınması və effektiv idarə olunması, yüksək gəlirli iş yerləri yaratmaqla həyat səviyyəsinin yüksəldilməsi;

  • milli iqtisadiyyatın şaxələnməsi, ölkənin mallar və xidmətlər üzrə ixrac potensialının reallaşdırılmasına nail olunması;

  • özəl sektorun və sahibkarlığın iqtisadi artımda rolunun daha da gücləndirilməsi;

  • özəl sektorun, sahibkarlığın inkişafı üçün stimulların gücləndirilməsi, biznes və rəqabət mühitinin daha da yaxşılaşdırılması;

  • sahibkarlığa dövlət dəstəyi mexanizmlərinin səmərəliliyinin daha da artırılması;

  • iqtisadiyyatda müasir texnologiyaların və innovasiyaların geniş tətbiqinin təşviq edilməsi;

  • aqrar sektorun yüksək texnoloji bazaya və dayanıqlı inkişaf prinsiplərinə əsaslanmaqla intensiv və səmərəli inkişafının stimullaşdırılması;

  • ərzaq təhlükəsizliyinin gücləndirilməsi;

  • iqtisadiyyatda uzunmüddətli investisiya resurslarının əsas mənbəyi olan kapital və sığorta bazarının inkişafının təmin edilməsi;

  • qeyri-neft-qaz ixrac mallarının həcminin artırılması;

  • rəqəmsal iqtisadiyyatın formalaşdırılması;

  • bank sektorunda maliyyə sabitliyinin və dayanıqlığın təmin olunması.

BAP-ın mövqeyinə görə, ölkə iqtisadiyyatına birbaşa xarici investisiyalar, o cümlədən infrastruktur sahələrinə strateji sərmayəçilər cəlb edilməlidir. Milli maraqların qorunması və xarici sərmayəçilərə rəqabət mühitinin yaradılması ilə investisiyaların səmərəli tənzimlənməsi üçün:

  • dövlət şirkətlərinin fəaliyyətində iqtisadi səmərənin yüksəldilməsi, bu sahədə şəffaflığın təmin edilməsi;

  • dövlət şirkətlərinin kommersiya prinsipləri əsasında fəaliyyət göstərmələri üçün zəmin yaradılması;

  • qabaqcıl beynəlxalq təcrübə nəzərə alınmaqla korporativ idarəetmə standartlarının tətbiq edilməsi və gəlirlilik səviyyələrinin artırılması;

  • iqtisadiyyatda şəffaflıq səviyyəsinin daha da yüksəldilməsi və kölgə iqtisadiyyatı ilə mübarizənin gücləndirilməsi, özəl və dövlət sektorunda şəffaflığın təmin edilməsi;

  • dövlət maliyyə idarəetməsində intizamın və hesabatlılığın artırılması daim diqqət mərkəzində olmalıdır.

3.2.2. Neft strategiyası və qeyri-neft-qaz sektorunun inkişafı sahəsində

BAP hesab edir ki, neft strategiyasının uğurla davam etdirilməsi və qeyri-neft-qaz sektorunun inkişafı məqsədilə yeni neft-qaz hasilatı, nəqli və emalı sistemlərinin fəaliyyəti daha da təkmilləşməlidir. Bu sahədə partiyanın hədəfləri aşağıdakılardır:

  • iqtisadiyyatın klasterlər əsasında inkişafı çərçivəsində neft, qaz və neft-kimya sənayesinin inkişaf etdirilməsi;

  • dünya enerji bazarları ilə inteqrasiya əlaqələrinin gücləndirilməsi;

  • qeyri-neft-qaz sənayesinin inkişafı məqsədilə ölkənin malik olduğu təbii və iqtisadi resursların təsərrüfat dövriyyəsinə cəlb edilməsinin genişləndirilməsi;

  • institusional mühitin inkişafı, elmi-texniki potensialın gücləndirilməsi;

  • yüksək təhsilə, innovativ bilik və bacarıqlara malik olan mütəxəssis hazırlığının təkmilləşdirilməsi, milli təhsil sisteminin modernləşdirilməsi;

  • müasir elmi tədqiqatlar üçün dəstək mexanizmlərinin formalaşdırılması və zəruri infrastrukturun yaradılması.

3.2.3. Qeyri-neft-qaz sektorunun inkişafı sahəsində

  • bölgələrdə yerli xammala əsaslanan sənaye müəssisələrinin müasir səviyyədə təşkil edilməsi və səmərəliliyinin artırılması;

  • sənaye müəssisələrində innovasiyayönümlü texnologiyaların tətbiqinin stimullaşdırılması;

  • qeyri-neft-qaz sənayesinin ənənəvi istehsal sahələrinin (kimya sənayesi, metallurgiya, maşınqayırma, elektrotexnika, elektronika, yüngül sənaye, yeyinti sənayesi və s.) inkişaf etdirilməsi;

  • rəqabətqabiliyyətli yeni istehsal sahələrinin yaradılması yolu ilə ixrac imkanlarının artırılması;

  • ölkənin qeyri-neft-qaz sektoruna yerli və xarici investisiyaların cəlb olunması məqsədilə səmərəli mexanizmlərin tətbiq edilməsi;

  • ixracyönümlü qeyri-neft-qaz sektorunun inkişafı üçün dövlət və özəl sektorun investisiya əməkdaşlığının möhkəmləndirilməsi;

  • turizm sektorunun inkişafı, beynəlxalq standartlara cavab verən turizm xidməti sahələrinin genişləndirilməsi;

  • müasir texnologiyaların tətbiqi yolu ilə aqroemal müəssisələrinin istehsal gücünün artırılması və yeni müəssisələrin yaradılması;

  • aqrar sektorun intensiv və səmərəli inkişafına nail olmaq üçün bu sahənin resurs və xidmətlərlə təminatının, innovasiyaların tətbiqi ilə potensialının, dövlət dəstəyinin gücləndirilməsi;

  • ekoloji təmiz kənd təsərrüfatı və ərzaq məhsulları istehsalının genişləndirilməsi və bazar infrastrukturunun inkişaf etdirilməsi.

3.2.4. İqtisadiyyatın daxili və xarici təsirlərə dayanıqlığı sahəsində

Azərbaycan iqtisadiyyatı qlobal iqtisadiyyatın tərkib hissəsi olduğundan, xarici mühitdən təsirlənə bilir. Bununla bağlı olaraq BAP aşağıdakı hədəfləri müəyyənləşdirir:

  • iqtisadiyyatın daxili və xarici təsirlərə dayanıqlığının gücləndirilməsi;

  • yeni reallıqlara uyğun fiskal çərçivənin formalaşdırılması;

  • iqtisadiyyatın şaxələnməsi vasitəsilə qeyri-neft-qaz sektorunun payının artırılması;

  • makroiqtisadi və maliyyə sabitliyini təmin etmək məqsədilə institusional idarəetmə mexanizmlərinin səmərəliliyinin artırılması.

3.2.5. Rəqəmsal inkişaf və nəqliyyat infrastrukturunun təkmilləşdirilməsi sahəsində

Rəqəmsal texnologiyalar və innovasiyalar sahəsində qlobal meyilləri və çağırışları, Azərbaycanın beynəlxalq texnoloji, innovativ və iqtisadi mərkəzlərlə əlaqələrini və strateji coğrafi mövqeyini nəzərə almaqla, telekommunikasiya, tranzit və nəqliyyat xidmətlərinin inkişafı yaradılması sahəsində BAP-ın hədəfləri:

  • əhaliyə yüksək keyfiyyətli və dayanıqlı telekommunikasiya xidmətlərinin göstərilməsi, onlara əlçatanlığın təmin edilməsi;

  • böyük məlumatlar (“big data”), süni zəka və digər qabaqcıl texnologiyaların tətbiqi ilə ölkədə rəqəmsal transformasiyanın sürətləndirilməsi;

  • əhalinin rəqəmsal hazırlığının, müvafiq bilik, bacarıq və vərdişlərinin artırılması;

  • ölkədə elmi tədqiqat fəaliyyətinin nəticələrinin kommersiyalaşdırılması, texnologiya transferi və qlobal əhəmiyyətli innovasiyaların ortaya çıxması üçün innovativ mühitin və dinamik startap ekosisteminin formalaşdırılması;

  • yerli və beynəlxalq daşımaların idarə olunması mexanizminin təkmilləşdirilməsi;

  • əhaliyə göstərilən nəqliyyat xidmətlərinin keyfiyyətinin artırılması;

  • idxal, ixrac əməliyyatları və tranzit daşımaları üçün sərf edilən vaxtın qısaldılması və sərhəd-keçid prosedurlarının sadələşdirilməsi;

  • paytaxtın, habelə digər şəhər, rayon və kəndlərin ictimai nəqliyyat sisteminin təkmilləşdirilməsi;

  • nəqliyyat sahəsində təhlükəsizliyin gücləndirilməsi üçün tədbirlərin görülməsi.

3.2.6. Ətraf mühit və ekoloji tarazlıq sahəsində

BAP ətraf mühitin qorunmasını əsas hədəflərindən biri hesab edir və bu sahədə aşağıdakı vəzifələri müəyyənləşdirir:

  • iqtisadiyyatın bütün sahələrinin inkişafı prosesində ətraf mühitin mühafizəsi tələblərinin ön plana çəkilməsi;

  • biomüxtəlifliyin mühafizəsi və xüsusi mühafizə olunan təbiət ərazilərinin infrastrukturunun inkişafı;

  • su hövzələrinin, o cümlədən Xəzər dənizinin ekoloji mühitinin mühafizəsi;

  • ekoturizmin inkişafı;

  • meşə ilə örtülü sahələrin miqyasının artırılması, o cümlədən aqromeşə massivlərinin salınması;

  • təbii sərvətlərdən səmərəli istifadə və ətraf mühitin qorunması məqsədilə tullantıların zərərsizləşdirilməsi;

  • sənaye və məişət tullantılarının təkrar emalı üçün yeni müəssisələrin yaradılması;

  • iri sənaye və dağ-mədən obyektlərinin fəaliyyəti nəticəsində yararsız vəziyyətə düşmüş torpaqların bərpası;

  • kənd təsərrüfatına yararlı torpaqlardan istifadə sisteminin təkmilləşdirilməsi;

  • su ehtiyatlarından və dayanıqlı enerji mənbələrindən səmərəli istifadə;

  • iqtisadi inkişafla ekoloji mühit arasında tarazlığın təmin olunması;

  • bərpa olunan enerji mənbələrindən istifadənin genişləndirilməsi.

3.3. Sosial sahədə

Əhalinin sosial müdafiəsinin təmin olunması və insan kapitalının inkişaf etdirilməsi dövlət siyasətinin prioritet istiqamətlərindən biri olmalıdır.

Şəhid ailələri, müharibə veteranları və müharibə ilə əlaqədar əlilliyi olan şəxslər daimi dövlətin diqqət mərkəzində olmalı, bu təbəqədən olan insanlara dövlət diqqət və qayğı göstərərək onların yaşayış səviyyəsini yüksəltməlidir.

Elm və təhsilin davamlı inkişafı, əhalinin sağlamlığının qorunması və müasir tələblərə uyğun səhiyyə infrastrukturunun yaradılması, gender bərabərliyinin təmin olunması və ailə institutunun möhkəmləndirilməsi, gənclərin hərtərəfli inkişafının təmin edilməsi dövlət siyasətinin mühüm tərkib hissəsi olmalıdır.

3.3.1. Hamı üçün layiqli həyat səviyyəsi sahəsində

BAP-ın mövqeyinə görə, davamlı inkişaf inklüziv cəmiyyətin formalaşmasına təkan verməli və hər bir vətəndaş bunu öz həyatında hiss etməlidir. Layiqli həyat səviyyəsinin təmin edilməsi üçün:

  • əməkhaqqı artımının əmək məhsuldarlığının artımı ilə uzlaşdırılması;

  • bütün əhali qrupları üçün səmərəli məşğulluğa və layiqli əməyə nail olunması;

  • məşğulluq sahəsində özəl sektorun payının artması üçün təsirli tədbirlərin görülməsi;

  • əhalinin aşağıgəlirli təbəqəsinin sosial-iqtisadi rifahının yüksəldilməsi;

  • gəlirlərin və qeyri-formal məşğulluğun leqallaşdırılması istiqamətində işlərin görülməsi.

3.3.2. İnklüziv cəmiyyət və sosial rifah sahəsində

Azərbaycanda əhalinin sosial rifahını daha da yüksəltmək, inklüziv və özəl təşəbbüslərə əsaslanan iqtisadi artımı təmin etmək üçün BAP-ın hədəfləri aşağıdakılardır:

  • aşağıgəlirli və yoxsulluğa həssas təbəqənin, əlilliyi olan şəxslərin, o cümlədən uşaqların sosial müdafiəsinin və təminatının gücləndirilməsi;

  • pensiya təminatı sisteminin maliyyə dayanıqlığının möhkəmləndirilməsi;

  • pensiya məbləğinin ödənilən sığorta haqqına mütənasibliyinin artırılması;

  • əlilliyi olan şəxslər, o cümlədən uşaqlar üçün sosial reabilitasiya infrastrukturunun əlçatan olması.

3.3.3. Paytaxt və regionların tarazlı inkişafı sahəsində

BAP-ın əsas hədəflərindən biri regionların inkişafının paytaxtın inkişaf səviyyəsinə uyğunlaşdırılmasını təmin etməkdir. Bununla bağlı olaraq partiya:

  • regionlarda iqtisadi fəallığın daha da gücləndirilməsi üçün mövcud iş qüvvəsinin və bütün resursların iqtisadi dövriyyəyə cəlb edilməsini;

  • regionlarda paytaxtla müqayisə oluna biləcək yaşayış standartlarının təmin olunmasını;

  • regionların milli gəlirdə və büdcə daxilolmalarında payının artırılmasını nəzərdə tutur.

3.3.4. Elm və təhsil sahəsində

BAP hesab edir ki, Azərbaycan iqtisadiyyatının uzunmüddətli inkişafı müasir tələblərə cavab verən elm və təhsilə əsaslanmalıdır. Buna görə də:

  • ümumi təhsilin məzmunca gücləndirilməsi üçün təhsil sistemində modernləşmənin həyata keçirilməsi;

  • yüksək keyfiyyətli təhsil almaq, elmi biliklərə yiyələnmək imkanlarının və inklüziv təhsilin genişləndirilməsi, bu sahədə müasir texnologiyalardan geniş istifadə edilməsi;

  • peşəkarlıq, sosial vərdişlər və rəqəmsal bacarıqların qarşılıqlı bağlılığına söykənən təhsilə xüsusi əhəmiyyət verilməsi;

  • aztəminatlı ailələrdən olan təhsil alanlara maddi dəstəyin verilməsi;

  • kadr hazırlığının əmək bazarının tələblərinə uyğunlaşdırılması;

  • peşə hazırlığı sisteminin inkişafı üçün müasir tələblərə uyğun mütəxəssislərin hazırlanması;

  • təhsilin idarəedilməsinin təkmilləşdirilməsi;

  • xaricdə təhsil sisteminin imkanlarından milli kadr hazırlığında istifadənin genişləndirilməsi;

  • ali təhsil müəssisələrinin fəaliyyətində beynəlxalq rəqabətədavamlılığın təmin olunması.

3.3.5. Əhalinin sağlamlığı və səhiyyə sahəsində

Əhalinin sağlamlığının qorunması və səhiyyə sahəsində BAP-ın hədəfləri aşağıdakılardır:

  • səhiyyəyə ayrılan vəsaitin ümumi daxili məhsulda payının artırılması və onun səmərəli istifadəsini təmin edən mexanizmlərin təkmilləşdirilməsi;

  • səhiyyənin maddi-texniki bazasının gücləndirilməsi, onların müasir tibbi avadanlıqla təchiz edilməsi;

  • səhiyyənin idarə olunmasında mərkəzləşmədən imtina edilməsi;

  • icbari tibbi sığorta sisteminin təkmilləşdirilməsi;

  • əhalinin bütün təbəqələrinin tibbi xidmətlərə və dərman vasitələrinə əlçatanlığının təmin edilməsi;

  • yoluxucu xəstəliklərin profilaktikası işinin gücləndirilməsi;

  • ana və uşaqların sağlamlığının qorunmasına dair hüquqi-təşkilati mexanizmlərin təkmilləşdirilməsi;

  • ölkənin əsas dərman vasitələri və tibbi ləvazimatlarla davamlı təminatı məqsədilə daxili istehsalın artırılması.

3.3.6. Gender bərabərliyi və ailə institutunun inkişafı sahəsində

Gender bərabərliyinin təmin edilməsi və ailə institutunun inkişafı BAP-ın diqqət mərkəzində dayanan əsas məsələlərdən biridir. Bu sahənin inkişafı ilə bağlı partiyanın hədəfləri:

  • əmək bazarında qadınlar və kişilər üçün bərabər imkanların təmin edilməsi;

  • ana və uşaqların sosial müdafiəsinin gücləndirilməsi;

  • müasir tələblərə cavab verən uşaq bağçalarının sayının artırılması.

3.3.7. Gənclərin potensialının gücləndirilməsi sahəsində

Azərbaycan gənclərinin hərtərəfli inkişafına nail olmaq, onları yaşlı nəslin təcrübəsindən faydalanmaqla vətənpərvərlik əhval-ruhiyyəsində tərbiyə etmək BAP-ın fəaliyyətində mühüm yer tutur. Partiyanın bu sahədə hədəfləri:

  • gənclərin sosial müdafiəsinin daha da gücləndirilməsi;

  • gənclərin peşə hazırlığı səviyyəsinin yüksəldilməsi və məşğulluğunun təmin edilməsi;

  • gənclərin asudə vaxtının səmərəli təşkili, onların elmi-texniki biliklərinin inkişaf etdirilməsi, elm, texnika və innovasiyalar sahəsinə marağının artırılması;

  • sağlamlıq imkanları məhdud olan gənclər üçün istirahət xidmətlərinin artırılması;

  • gənclərə göstərilən sosial xidmətlərin əlçatanlığının artırılması;

  • gənclər arasında milli-mənəvi dəyərlərin və vətənpərvərliyin təşviqinin gücləndirilməsi;

  • gənclər arasında idmanın və sağlam həyat tərzinin təşviqi;

  • gənclərin elmi, mədəni və innovativ potensialından səmərəli istifadə edilməsi.

3.4. Korrupsiyaya qarşı mübarizə və şəffaflığın təmin edilməsi

Azərbaycanda şəffaflığın artırılması və korrupsiyaya qarşı mübarizə və şəffaflığın təmin edilməsi sahəsində BAP-ın hədəfləri:

3.4.1. Korrupsiyaya qarşı mübarizə sahəsində

Korrupsiyanın qarşısının alınması, dövlət orqanlarının fəaliyyətində və özəl sektorda şəffaflığın təmin edilməsi sahəsində BAP-ın hədəfləri:

  • korrupsiya ilə əlaqədar hüquqpozmalarla bağlı müraciətlərə baxılmasında operativliyin təmin olunması;

  • korrupsiyanın ümumilikdə və sahələr üzrə səbəbləri, xüsusiyyətləri və səviyyəsinin öyrənilməsi məqsədilə tədqiqatların və rəy sorğularının keçirilməsi;

  • korrupsiya ilə bağlı risklərin müəyyən edilməsinə və qarşısının alınmasına dair ölkə qanunvericiliyinin təkmilləşdirilməsi.

3.4.2. İnsan hüquqları sahəsində

Azərbaycanda insan hüquqlarının təmin edilməsi ölkədə gedən demokratik proseslərin tərkib hissəsi olmalıdır. Buna görə də:

  • cəmiyyətin və dövlətin demokratik inkişafı;

  • dövlət idarəçiliyində və özəl sektorun fəaliyyətində qanunun aliliyinin təmin edilməsi;

  • dövlət orqanlarında və özəl sektorda şəffaflığın təmin olunması işində KİV-ə və QHT-lərə dəstəyin verilməsi;

  • insan hüquqlarının qorunması.

3.4.3. Qanunvericiliyin təkmilləşdirilməsi sahəsində

Ölkə qanunvericiliyinin təkmilləşdirilməsi və müvafiq institutların fəaliyyətinin gücləndirilməsi sahəsində BAP-ın hədəfləri aşağıdakılardır:

  • qanunun aliliyinin təmin edilməsi üçün icra intizamı və nəzarət sisteminin gücləndirilməsi;

  • iqtisadi islahatların səmərəliliyinin artırılması məqsədilə iqtisadi qanunvericiliyin daim yenilənməsi;

  • qanunvericiliyin təsirinin qiymətləndirilməsi sahəsində işlərin davam etdirilməsi;

  • piratçılıq və kontrafaksiya da daxil olmaqla əqli mülkiyyət hüquqlarının pozulmasına qarşı səmərəli tədbirlərin görülməsi.

3.5. Vətəndaş cəmiyyətinin inkişafı sahəsində

Dövlət siyasətinin əsas istiqamətlərindən biri vətəndaş cəmiyyətinin inkişaf etdirilməsidir. Demokratik dəyərlərə söykənən ictimai münasibətlər ölkəmizdə vətəndaş cəmiyyətini möhkəmlənməsinə xidmət etməlidir.

Dövlət orqan və qurumları ilə vətəndaş cəmiyyəti institutları, o cümlədən kütləvi informasiya vasitələri arasında sıx əməkdaşlıq yaradılmalıdır.

QHT-lərə və mediaya dövlət dəstəyinin verilməsi onların cəmiyyətin müxtəlif sahələrində gedən prosesləri daha dərindən öyrənmək və əsaslandırılmış təkliflərlə çıxış etmək imkanlarını artırdığına görə Azərbaycanda söz və mətbuat azadlığı təmin olunmalı, informasiya təhlükəsizliyi sahəsində məqsədyönlü dövlət siyasəti həyata keçirilməlidir.

Vətəndaş cəmiyyətinin inkişaf etməsi və rolunun artırılması üçün BAP-ın hədəfləri aşağıdakılardır:

  • ümummilli məsələlərin həllində qeyri-hökumət təşkilatlarının və medianın potensialından səmərəli şəkildə istifadə olunması;

  • cəmiyyətin müxtəlif sahələrinin inkişafına dair QHT-lərin əsaslandırılmış təkliflərinin diqqət mərkəzində saxlanılması;

  • medianın fəaliyyətini tənzimləyən qanunvericilik sisteminin təkmilləşdirilməsi;

  • dövlət orqan və qurumları ilə media arasında qarşılıqlı etimadın artırılması;

  • medianın iqtisadi müstəqilliyinin möhkəmləndirilməsi;

  • qlobal informasiya məkanında Azərbaycan mediasının rəqabətqabiliyyətli fəaliyyətinin və beynəlxalq ictimai rəyə təsir imkanlarının gücləndirilməsi.

3.6. Azərbaycan dili və dünya azərbaycanlılarının həmrəyliyi sahəsində

Azərbaycan dilinin milli dövlətçiliyin əsas atributlarından biri olması səbəbilə ana dilinin dövlət dili kimi tətbiqi işinin təkmilləşdirilməsi diqqət mərkəzində saxlanılmalı, Azərbaycan dilinin qloballaşma şəraitində zamanın tələblərinə uyğun istifadəsi, gənc nəslin ana dilinə sevgi və hörmət ruhunda tərbiyə olunmalı, ədəbi dilin normalarına ciddi şəkildə əməl edilməsi sahəsində mühüm addımlar atılmalıdır.

Azərbaycan dilinin inkişafı, xarici ölkələrdə yaşayan soydaşlarımız arasında həmrəyliyin gücləndirilməsi, onların ölkəmizlə əlaqələrinin dərinləşdirilməsi yönündə BAP-ın hədəfləri:

  • Azərbaycan dilinin saflığının qorunması və inkişafı;

  • Azərbaycan dilinin inkişafı və ədəbi dil normalarının qorunması ilə bağlı qanunvericiliyin təkmilləşdirilməsi;

  • gənc nəslin ana dilinə sevgi və hörmət ruhində tərbiyə olunması;

  • ədəbi dilin normalarına ciddi şəkildə əməl edilməsi;

  • Azərbaycan dilinin qloballaşma şəraitində zamanın tələblərinə uyğun inkişafı, qorunması, elektron məkanda daha geniş istifadəsi;

  • xarici ölkələrdə fəaliyyət göstərən Azərbaycan diasporunun güclənməsinə dəstək göstərilməsi;

  • xarici ölkələrdə yaşayan soydaşlarımız arasında xalqımızın milli-mənəvi dəyərlərinə təbliği;

  • xarici ölkələrdə yaşayan azərbaycanlıların Azərbaycan dilində təhsil almalarına və bu dildən sərbəst istifadə etmələrinə köməklik göstərilməsi.

3.7. Mədəni irsin və milli-mənəvi dəyərlərin qorunması sahəsində

Azərbaycan xalqı dünyada zəngin milli-mənəvi dəyərləri və adət-ənənələri ilə tanınır.

Mədəni irsin və milli-mənəvi dəyərlərin qorunması dövlət siyasətinin əsas istiqamətlərindən biri olmalı, mədəni irsin və milli-mənəvi dəyərlərin dərindən öyrənilməsi və təşviq edilməsi üçün əlverişli ictimai-siyasi, elmi-mənəvi mühit yaradılmalıdır.

Mədəni irsin və milli-mənəvi dəyərlərin qorunması sahəsində BAP-ın hədəfləri aşağıdakılardır:

  • xalqımızın tarixi, dili, ədəbiyyatı və mədəniyyətinin hərtərəfli şəkildə, dərindən öyrənilməsi;

  • gənc nəslin milli-mənəvi dəyərlər ruhunda tərbiyə olunması;

  • dünyada gedən qloballaşma prosesinin milli mənəvi dəyərlərə mənfi təsirinin qarşısının alınması.

3.8. Vətəndaş həmrəyliyinin təminatı sahəsində

Ümummilli məsələlərin xalqımızın maraqları çərçivəsində həllində və Azərbaycanın demokratik yolla inkişafında vətəndaş həmrəyliyi mühüm əhəmiyyət kəsb edir.

Dilindən, etnik mənsubiyyətindən, siyasi və dini baxışlarından asılı olmayaraq ölkə vətəndaşları arasında milli həmrəyliyi təmin etmək BAP-ın əsas məqsədlərindən biridir. Partiya vətəndaş həmrəyliyinin təmin olunması sahəsində aşağıdakı hədəfləri müəyyənləşdirir:

  • ölkəmizdə yaşayan müxtəlif millətlərin və dinlərin nümayəndələri arasında həmrəyliyin təmin edilməsi, onların Azərbaycan dövləti ətrafında sıx birləşməsinin möhkəmləndirilməsi;

  • dini-mədəni müxtəlifliyin qorunması, dinlərarası və mədəniyyətlərarası dialoqun inkişafı;

  • siyasi, sosial və etnik mənsubiyyətindən, dini baxışlarından asılı olmayaraq hər kəsin qanun qarşısında bərabərliyinin təmin olunması.

3.9. Beynəlxalq münasibət və Xarici siyasət sahəsində

Ölkəmizin xarici siyasəti beynəlxalq hüquqi normalar, dövlətlərin suverenliyinə və ərazi bütövlüyünə hörmət, daxili işlərinə müdaxilə edilməməsi və milli maraqlarımızın əsas götürülməsi kimi prinsiplər əsasında qurulmalı, Azərbaycanın geosiyasi vəziyyəti nəzərə alınmalı, onun dünya ölkələri ilə ayrı-ayrılıqda və çoxtərəfli formatda münasibətləri inkişaf etdirilməlidir.

Milli maraqlara əsaslanan xarici siyasətin aparılması sahəsində BAP-ın hədəfləri aşağıdakılardır:

  • Azərbaycanın milli mənafeyi uca tutulmaq şərtilə xarici siyasətin sülh və qarşılıqlı əməkdaşlıq prinsipləri əsasında qurulması;

  • dünya dövlətləri ilə bərabərhüquqlu, qarşılıqlı-faydalı əlaqələrin möhkəmləndirilməsi və bundan ölkəmizin davamlı inkişafında səmərəli vasitə kimi istifadə olunması;

  • regional və beynəlxalq təhlükəsizliyin təmin edilməsi;

  • Azərbaycanın beynəlxalq və regional təşkilatlarda mövqeyinin möhkəmləndirilməsi;

  • xarici ölkələrlə iqtisadi, elmi, mədəni və humanitar əlaqələrin genişləndirilməsi;

  • bəşəriyyəti narahat edən qlobal problemlərin aradan qaldırılması üçün beynəlxalq əməkdaşlığın möhkəmləndirilməsi.

3.10. Milli təhlükəsizlik və Ordu quruculuğu sahəsində

Azərbaycan Respublikasının müdafiə siyasəti dövlətin hərbi təhlükəsizliyini təmin etmək məqsədilə hərbi, siyasi, iqtisadi və sosial tədbirlər əsasında formalaşır, ölkəmizin milli maraqlarının həyata keçirilməsi üçün əlverişli daxili və xarici şəraitin yaradılmasına xidmət edir.

Ölkəmizin müstəqilliyi, suverenliyi, ərazi bütövlüyü, konstitusiya quruluşu, xalqın və dövlətin milli maraqları, insan, cəmiyyət və dövlətin hüquq və mənafelərinin hərbi-siyasi, habelə digər təhdidlərdən qorunması Azərbaycanın hərbi təhlükəsizliyinin təmin edilməsi əsas vəzifələrdən olmalıdır.

Azərbaycanın Silahlı Qüvvələri ən şərəfli dövrünü yaşayır. Silahlı Qüvvələrimizin güclü maddi-texniki bazaya, zabit-əsgər heyətinin yüksək hərbi hazırlığa və vətənpərvərlik əhval-ruhiyyəsinə malik olması özünü Vətən müharibəsində parlaq şəkildə göstərdi. İşğal altında olan torpaqlarımız azad edildi. Bütün dünyaya sübut olundu ki, Azərbaycan müasir tələblərə tam cavab verən, yüksək mənəvi-psixoloji hazırlıqlı, istənilən döyüş tapşırığını ən yüksək səviyyədə yerinə yetirməyə qadir olan Silahlı Qüvvələrə malikdir.

BAP milli təhlükəsizliyimizin təmin olunmasına kompleks yanaşmanı təklif edir. Bunun üçün hərbi, siyasi, iqtisadi, ekoloji və s. təhlükəsizlik sistemi yaradılmalı və milli ordumuz hər hansı təcavüzü dəf etmək iqtidarında olmalıdır.

BAP öz proqram məqsədlərini həyata keçirmək üçün demokratik seçkilər yolu ilə hakimiyyətə gəlmək iddiasını bildirir və milli mənafeyə xidmət edən bütün siyasi qüvvələrlə bərabərhüquqlu əməkdaşlığa hazır olduğunu bəyan edir.

Böyük Azərbaycan Partiyası – millətimizə və dövlətimizə ləyaqətlə xidmət etməyi özünün şərəf işi hesab edir.