Deputat: “Tramp hakimiyyəti Azərbaycanla əməkdaşlıq etməkdə maraqlıdır”
Böyük Azərbaycan Partiyası
ABŞ Müdafiə Nazirliyinin “Stars and Stripes” nəşri Konqresi 907-ci maddəni ləğv etməyə və TRIPP layihəsinin uğurunu möhkəmləndirməyə çağırıb. ABŞ qanunvericiliyinin bu müddəası Ermənistan və Azərbaycan arasındakı münaqişə zamanı erməni diasporunun təsiri altında qəbul edilmiş keçmişin qalığı adlandırılıb. Bu müddəa hələ də Azərbaycana birbaşa yardımı məhdudlaşdırır. 907-ci maddə ABŞ və Azərbaycan münasibətlərinin inkişafının qarşısında bir sədd sayıla bilərmi?
Mövzu ilə bağlı Milli Məclisin deputatı, Böyük Azərbaycan Partiyasının sədri Elşad Musayev mətbuata açıqlamasında bildirib ki, cənab Prezident İlham Əliyevin və Ermənistan Baş naziri Paşinyanın Trampın iştirakı ilə Vaşinqtonda keçirdikləri görüşdən sonra münasibətlər yalnız Ermənistan-Azərbaycan münasibətləri deyil, eyni zamanda Amerika Birləşmiş Ştatları ilə Azərbaycan arasında münasibətlər yeni müstəviyə keçdi: “bu gün görünür ki, Tramp hakimiyyəti Bayden hakimiyyətindən fərqli olaraq Azərbaycanla strateji sahələrdə də əməkdaşlıq etməkdə maraqlıdır, eyni zamanda Zəngəzur dəhlizinə Amerika Birləşmiş Ştatlarının qarant ölkə kimi bu proseslərə qoşulması çox əhəmiyyətli hadisədir”.
Elşad Musayev qeyd edib ki, Amerika Birləşmiş Ştatları və Azərbaycan ölkələr arasındakı münasibətlərin əvvəlki dövrlərdən fərqli olmasını istəyirsə, təbii ki, düzəlişin ləğvi məsələsi gündəmə daşınmalıdır: “907-ci düzəlişin qalması Amerika Birləşmiş Ştatları ilə Azərbaycan arasında son dövrdə yaranmış müsbət tendensiya ilə əlaqələrə bir kölgə salır. Bu düzəliş 1992-ci ildə qəbul olunanda da bu ədalətsiz qərarın əleyhinə çıxışlar eləmişik. Ədaləti bərpa etmək üçün Amerika Birləşmiş Ştatlarının əlində böyük imkanlar var. Şans var və çox yaxşı olardı ki, bu şansdan istifadə etsinlər. Bundan sonrakı müddətdə 907-ci düzəlişi aradan götürdükdən sonra ABŞ-la Azərbaycan arasında münasibətlər daha da inkişaf edə bilər. Daha doğrusu, bu məsələdən sonra əməkdaşlığın ayrı-ayrı sahələrinə müsbət təsirini görə bilərik”.
BAP Mətbuat Xidməti
