Millət vəkili Elşad Musayev şəhid məzarını ziyarət etdi
Böyük Azərbaycan Partiyası
Bu gün Milli Məclisin deputatı, Böyük Azərbaycan Partiyasının sədri Elşad Musayev II Şəhidlər Xiyabanında dəfn olunmuş şəhid polkovnik-leytenant Həmdəm Ağayevin məzarını ziyarət etdikdən sonra anım tədbirində iştirak etdi. Tədbirə şəhid ailələri, Binəqədi Rayon İcra Hakimiyyətinin əməkdaşları, rayon ictimaiyyəti və şəhidin ailə üzvləri qatıldı.
Həmdəm Ağayev 2000-ci ildə Azərbaycan Silahlı Qüvvələrinin Naxçıvan MR ərazisində yerləşən hərbi hissəsində leytenant hərbi rütbəsində xidmətə başlayıb. O, 2003-cü ildə baş leytenant, 2004-cü ildə kapitan, 2006-cı ildə mayor, 2012-ci ildə isə polkovnik-leytenant hərbi rütbəsi alıb.
2010-2017-ci illərdə Azərbaycan Silahlı Qüvvələrinin 4-cü Ordu Korpusunda xidmət edən Həmdəm Ağayev, 2017-2018-ci illərdə Qusar şəhərində yerləşən hərbi hissənin Komandir müavini – Qərargah rəisi vəzifəsində xidmət edib.
Həmdəm Ağayev 2018-ci ildən 4-cü Ordu Korpusunun Qərargah rəisi vəzifəsində xidmət edib.
Azərbaycan Ordusunun polkovnik-leytenantı olan Həmdəm Ağayev Vətən müharibəsi zamanı Füzulinin azadlığı uğrunda gedən döyüşlərdə savaşıb. Həmdəm Ağayev oktyabrın 9-da Füzuli döyüşləri zamanı şəhid olub. II Şəhidlər Xiyabanında dəfn olunub.
Bir oğul və bir qız atası idi.
BAP Mətbuat Xidməti
