Nizamnamə
BÖYÜK AZƏRBAYCAN PARTİYASININ NİZAMNAMƏSİ
- ÜMUMİ MÜDDƏALAR
1.1. Böyük Azərbaycan Partiyası (bundan sonra – Partiya) Azərbaycan Respublikasının vətəndaşları tərəfindən ölkənin siyasi həyatında və vətəndaşların siyasi iradəsinin ifadə olunmasında iştirak etmək məqsədi ilə irqi, etnik, dini, dil, cinsi, mənşə, əqidə və sosial mənsubiyyətindən asılı olmayaraq, onları ümumi siyasi ideya və məqsəd ətrafında birləşdirən, ölkənin siyasi həyatında iştirak edən qeyri-kommersiya hüquqi şəxsidir.
1.2. Partiya öz fəaliyyətini Azərbaycan Respublikasının Konstitusiyası, “Siyasi partiyalar haqqında” Azərbaycan Respublikasının Qanunu, qüvvədə olan digər normativ hüquqi aktlar və bu Nizamnamə əsasında həyata keçirir.
1.3. Könüllülük, partiya üzvlərinin hüquq bərabərliyi, özünüidarə, kollegiallıq, qanunçuluq və aşkarlıq Partiyanın fəaliyyət prinsipləridir.
1.4. Partiya 12.08.2005-ci il tarixdə 48 nömrə ilə Azərbaycan Respublikasının Ədliyyə Nazirliyində dövlət qeydiyyatına alınmışdır.
1.5. Partiyanın müstəqil balansı, üzərində adı yazılmış möhürü, ştampı, Azərbaycan Respublikasının banklarında hesablaşma və digər hesabları və rekvizitləri vardır.
1.6. Partiyanın qısaldılmış adı: BAP
1.7. Partiyanın hüquqi ünvanı: Bakı şəhəri, Xətai rayonu, Babək prospekti, ev 78, mənzil 64.
- PARTİYANIN MƏQSƏDİ
2.1. Partiyanın məqsədi hüquqi dövlətin əsas prinsiplərindən olan qanunun aliliyinin, hakimiyyət bölgüsünün, vətəndaşların qanun qarşısında bərabərliyinin təmin olunması, istiqlalımızın, dövlətçiliyimizin və ərazi bütövlüyümüzün qorunması, hər bir fərdin azad olması, onun hüquqlarının qorunması, hər bir insanın öz istəyinə uyğun həyatını qurması, fəaliyyət göstərməsi, öz imkanlarını gerçəkləşdirməsi, sosial ədalət prinsipinin qorunması, azad insanın azad cəmiyyətdə yaşamasının təmin edilməsidir.
2.2. Partiya Azərbaycan Respublikasının Konstitusiya quruluşunun və dünyəvi xarakterinin zorakılıqla dəyişdirilməsini, ərazi bütövlüyünün pozulmasını, hakimiyyətin zorla ələ keçirilməsini və ya saxlanılmasını, kütləvi iğtişaşlara, terrorçuluğa açıq çağırışlar edilməsini, terrorçuluğun, dini ekstremizmin, mənşə, cinsi, etnik və digər ayrı-seçkiliyin, həmçinin sağlamlığın və ətraf mühitin qorunmasına zidd olan hərəkətlərin təbliğini, müharibəni, zorakılığı və qəddarlığı təbliğ etməyi, irqi, dini ədavəti qızışdırmağı və ya etnik düşmənçiliyin salınmasını məqsədəçatma üsulu kimi pisləyir və öz fəaliyyətində Azərbaycan Respublikası qanunvericiliyinə uyğun olaraq demokratik mübarizənin bütün formalarından istifadə edir.
- PARTİYANIN FƏALİYYƏT İSTİQAMƏTLƏRİ
3.1. Partiya aşağıdakı istiqamətlərdə fəaliyyət göstərir:
3.1.1. ölkənin siyasi həyatında iştirak edir;
3.1.2. vətəndaşların siyasi iradəsinin ifadə olunmasında, həmçinin ictimai rəyin formalaşdırılmasında iştirak edir;
3.1.3. vətəndaşlar arasında siyasi maarifləndirmə işi aparır;
3.1.4. ümummilli dəyərləri və vətənpərvərliyi təbliğ edir;
3.1.5. üzvlərinin siyasi fəallığına dəstək verir;
3.1.6. üzvlərinin siyasi iradəsini ifadə edir;
3.1.7. seçkilərin, həmçinin ümumxalq səsverməsinin (referendumun) keçirilməsində iştirak edir;
3.1.8. müxtəlif məsələlərlə bağlı rəy və təkliflərini təqdim etməklə Azərbaycan Respublikasının daxili və xarici siyasətinin formalaşmasına təsir göstərir.
- PARTİYANIN HÜQUQ VƏ VƏZİFƏLƏRİ
4.1. Partiyanın öz məqsədlərinə uyğun olaraq aşağıdakı hüquqları var:
4.1.1. məqsədləri və fəaliyyəti barədə məlumatları sərbəst yaymaq;
4.1.2. ideyalarını, məqsədlərini və proqramını təbliğ etmək;
4.1.3. digər siyasi partiyalarla fəaliyyətin əlaqələndirilməsi, habelə ümumi mənafelərin təmsil və müdafiə edilməsi məqsədilə könüllülük əsasında birləşib siyasi bloklar, ittifaqlar yaratmaq;
4.1.4. Azərbaycan Respublikası Milli Məclisinin deputatlarının, Azərbaycan Respublikası Prezidentinin və bələdiyyə seçkilərinin, həmçinin ümumxalq səsverməsinin (referendumun) keçirilməsində iştirakla bağlı Azərbaycan Respublikasının Seçki Məcəlləsində nəzərdə tutulmuş hüquqları həyata keçirmək;
4.1.5 fəaliyyət istiqamətlərinə aid məsələlərlə bağlı konfranslar, görüşlər, müzakirələr və digər ictimai tədbirlər təşkil etmək və keçirmək;
4.1.6. “Sərbəst toplaşmaq azadlığı haqqında” Azərbaycan Respublikasının Qanununa uyğun olaraq toplantılar, mitinqlər, nümayişlər, yürüşlər, piketlər və yığıncaqlar keçirmək;
4.1.7. hüquqlarının və qanuni mənafelərinin pozulması ilə bağlı inzibati və məhkəmə qaydasında şikayət vermək, Partiya üzvünün razılığı ilə onun Partiya üzvlüyü ilə bağlı hüquq, azadlıq və qanunla qorunan mənafeyinin müdafiəsi üçün də şikayət vermək;
4.1.8. bu Nizamnamədə və Partiyanın proqramında qeyd olunmuş məqsədlərlə (hədəflərlə) razı olmayan şəxsin üzvlüyə qəbulundan imtina etmək;
4.1.9. fəaliyyət istiqamətlərinə aid məsələlərlə bağlı təşəbbüslə və ictimai həyatın müxtəlif məsələləri barədə təkliflərlə çıxış etmək, o cümlədən dövlət orqanlarına (qurumlarına) və yerli özünüidarəetmə orqanlarına müvafiq təkliflər irəli sürmək;
4.1.10. hüquqi aktların layihələrini hazırlamaq və aidiyyəti üzrə təqdim etmək, həmçinin dövlət orqanları (qurumları), yerli özünüidarəetmə orqanları tərəfindən hüquqi aktların layihələrinin hazırlanmasında iştirak etmək, hüquqi aktlarda dəyişikliklər edilməsi, onların şərh edilməsi, qüvvəsinin dayandırılması və ya ləğv edilməsi ilə bağlı məsələ qaldırmaq;
4.1.11. “Media haqqında” Azərbaycan Respublikasının Qanununa uyğun olaraq çap mediasını təsis etmək (çap mediasının iştirakçısı olmaq);
4.1.12. sahibkarlıq fəaliyyəti (ictimai-siyasi nəşrlərin, digər təbliğat və təşviqat materialların hazırlanması və satışı, həmçinin çap mediasını təsis etmək (çap mediasının iştirakçısı olmaq) məqsədləri üçün təsərrüfat cəmiyyətləri yaratmaq və ya onlarda iştirak etmək) ilə məşğul olmaq;
4.1.13. beynəlxalq əməkdaşlıq əlaqələri qurmaq (digər ölkələrin siyasi partiyaları ilə əməkdaşlıq etmək, sazişlər bağlamaq, siyasi partiyaların beynəlxalq ittifaqlarına üzv olmaq);
4.1.14. Azərbaycan Respublikasının vətəndaşlarından qanuna uyğun olaraq ianələr qəbul etmək və qanunvericiliklə qadağan olunmayan digər gəlirlər əldə etmək;
4.1.15. konfranslar, görüşlər, müzakirələr və digər ictimai tədbirlər keçirmək;
4.1.16. partiyanın yerli təşkilatlarını yaratmaq, onların yenidən təşkil olunması və ləğv olunması barədə qərar qəbul etmək;
4.1.17. partiyanın məqsəd və vəzifələrinin həyata keçirilməsi üçün struktur bölmələrinə əmlak vermək;
4.1.18. qısaldılmış ada, həmçinin emblemə, bayrağa və s. rəmzlərə malik olmaq;
4.1.19. Azərbaycan Respublikasının Dövlət Bayrağını keçirdiyi tədbirlər zamanı qaldırmaq (asmaq) və ya yerləşdirmək;
4.1.20. nizamnamədən irəli gələn vəzifələri yerinə yetirmək üçün müqavilələr və sazişlər bağlamaq, məhkəmədə cavabdeh və iddiaçı qismində çıxış etmək, Azərbaycan Respublikası qanunvericiliyi və bu nizamnamə ilə müəyyənləşdirilmiş digər hüquqları həyata keçirmək.
4.2. Partiyanın öz məqsədlərinə uyğun olaraq aşağıdakı vəzifələri var:
4.2.1. öz fəaliyyətində Azərbaycan Respublikasının Konstitusiyasına, qanunlarına, digər normativ hüquqi aktlarına və bu Nizamnaməyə riayət etmək;
4.2.2. partiya üzvlərinin reyestrini aparmaq;
4.2.3. Azərbaycan Respublikası Milli Məclisinin deputatlarının, Azərbaycan Respublikası Prezidentinin və bələdiyyə seçkilərinin, həmçinin ümumxalq səsverməsinin (referendumun) keçirilməsində iştirakla bağlı Azərbaycan Respublikasının Seçki Məcəlləsində nəzərdə tutulmuş vəzifələri yerinə yetirmək;
4.2.4. “Mühasibat uçotu haqqında” Azərbaycan Respublikasının Qanununa uyğun olaraq mühasibat uçotunu aparmaq, maliyyə hesabatını tərtib etmək, qanunvericilikdə nəzərdə tutulmuş qaydada maliyyə fəaliyyətinə dair əlavə məlumat və sənədləri müvafiq orqanlara təqdim etmək;
4.2.5. siyasi sabitliyin və qanunçuluğun möhkəmləndirilməsinə, iqtisadiyyatın dirçəldilməsinə, vətəndaşların hüquq və azadlıqlarının təmin edilməsinə və əhalinin həyat səviyyəsinin yüksəldilməsinə yardım göstərmək;
4.2.6. iqtisadi islahatlarının keçirilməsində və demokratiyanın inkişaf etdirilməsində maraqlı olan Azərbaycan Respublikası vətəndaşlarına siyasi dəstək vermək;
4.2.7. dövlət və cəmiyyətin inkişafına yönəlmiş proqramların hazırlanması və həyata keçirilməsində iştirak etmək;
4.2.8. öz fəaliyyətində Azərbaycan Respublikasının Konstitusiyasına və Azərbaycan Respublikasının digər normativ hüquqi aktlarına, o cümlədən bu Nizamnaməyə və Partiyanın Proqramına əməl etmək;
4.2.9. fiziki və hüquqi şəxslərin hüquq və azadlıqlarına hörmət bəsləmək;
4.2.10. dövlət orqanlarının (qurumlarının), yerli özünüidarəetmə orqanlarının, vəzifəli şəxslərin fəaliyyətinə, həmçinin digər şəxslərin sahibkarlıq fəaliyyətinə müdaxilə etməmək;
4.2.11. digər siyasi partiyanın öz siyasi ideyalarını və baxışlarını azad və sərbəst yaymaq hüququna hörmət bəsləmək;
4.2.12. keçirdiyi mərasimlər və digər təntənəli tədbirlər zamanı Azərbaycan Respublikasının Dövlət Bayrağını qaldırarkən və ya asarkən Azərbaycan Respublikası Dövlət Himninin ifa edilməsini təmin etmək;
4.2.13. siyasi partiyanın hüquqi ünvanı və əlaqə telefonları dəyişdikdə, bu barədə məlumatları müvafiq icra hakimiyyəti orqanına təqdim etmək;
4.2.14. “Siyasi partiyalar haqqında” Azərbaycan Respublikasının Qanunu və digər normativ hüquqi aktlarda nəzərdə tutulmuş sənədləri və məlumatları müvafiq icra hakimiyyəti orqanına dövlət qeydiyyatı üçün təqdim etmək;
4.2.15. bu Nizamnaməyə və Azərbaycan Respublikasının normativ hüquqi aktlarına uyğun olaraq digər vəzifələri yerinə yetirmək.
4.3. Bu Nizamnamənin 4.1.12-ci bəndində nəzərdə tutulanlar istisna olmaqla, partiya sahibkarlıq fəaliyyətinin digər növləri ilə məşğul ola bilməz.
- PARTİYADA ÜZVLÜK MƏSƏLƏLƏRİ
5.1. Partiyanın nizamnaməsini qəbul edən 18 yaşına çatmış tam fəaliyyət qabiliyyətli Azərbaycan Respublikası vətəndaşları Partiyanın üzvü ola bilərlər. Əcnəbilər və vətəndaşlığı olmayan şəxslər, habelə siyasi partiyaya üzvlüyü qanunla qadağan edilən digər şəxslər Partiyanın üzvü ola bilməz. Partiyaya üzvlük və üzvlüyü tərk etmək könüllüdür. Partiya üzvü digər siyasi partiyaların üzvü ola bilməz. Partiyanın üzvü Partiyanın yalnız bir yerli təşkilatında qeydiyyatda ola bilər.
5.2. Partiya üzvlüyünə qəbul həmin şəxsin yerli təşkilatlarının daimi fəaliyyət göstərən orqanlarına yazılı müraciəti əsasında həyata keçirilir. Üzvlüyə qəbul edilmə haqqında qərar Partiyanın yerli təşkilatlarının sədrləri tərəfindən qəbul edilir. Partiya üzvünə onun Partiya mənsubiyyətini təsdiq edən üzvlük vəsiqəsi verilir.
5.3. Üzvlük haqqının miqdarı və ödənilməsi qaydası partiyanın Siyasi Şurası tərəfindən müəyyən edilir.
5.4. Partiya üzvünün aşağıdakı hüquqları var:
5.4.1. bu Nizamnamədə müəyyən edilmiş qaydada Partiya orqanlarının və struktur qurumlarının təşkilində iştirak etmək, həmçinin Partiyanın orqanlarını seçmək və onlara seçilmək (təyin edilmək);
5.4.2. Partiyanın fəaliyyəti haqqında məlumat almaq;
5.4.3. Partiyanın istənilən orqanına və struktur qurumlarına sorğu, təklif, ərizə və şikayət ilə müraciət etmək və öz müraciətinə dair mahiyyəti üzrə cavab almaq;
5.4.4. Partiyanın orqanlarının və struktur qurumlarının (Qurultay istisna olmaqla) hərəkət və ya hərəkətsizliyindən Mərkəzi Nəzarət-Təftiş Komissiyasına, sonuncunun hərəkət və ya hərəkətsizliyindən Qurultaya, Qurultayın qərarından isə məhkəməyə şikayət vermək;
5.4.5. öz iradəsini sərbəst formada ifadə etmək;
5.4.6. Partiyanın üzvlüyündən azad surətdə çıxmaq.
5.4.7. Azərbaycan Respublikasının normativ hüquqi aktlarına və bu Nizamnaməyə uyğun olaraq digər hüquqları həyata keçirmək
5.5. Partiya üzvünün aşağıdakı vəzifələri var:
5.5.1. Partiyanın Nizamnamə və Proqramı ilə tanış olmaq;
5.5.2. bu Nizamnamə və Partiyanın Proqramında göstərilmiş tələblərə əməl etmək;
5.5.3. Partiya orqanlarının və struktur qurumlarının qanuni qərarlarını yerinə yetirmək;
5.5.4. Partiyanın fəaliyyətində iştirak etmək;
5.5.5. üzvlük haqqını ödəmək;
5.5.6. partiya sıralarının genişlənməsində yardımçı olmaq;
5.5.7. Partiyanın adına, məqsəd və vəzifələrinə xələl gətirən hərəkətlərə yol verməmək;
5.5.8. Partiya tərəfindən aparılan üzvlərin reyestrində özünə aid olan məlumatlarda baş vermiş dəyişikliklər barədə Partiyaya məlumat vermək;
5.5.9. Azərbaycan Respublikasının normativ hüquqi aktlarına və bu Nizamnaməyə uyğun olaraq digər vəzifələri yerinə yetirmək.
5.6. Partiya üzvlüyünə aşağıdakı hallarda xitam verilir:
5.6.1. öz ərizəsinə əsasən Partiyanın üzvlüyündən çıxdıqda;
5.6.2. Partiya üzvü öldükdə və ya məhkəmənin qərarı ilə ölmüş elan edildikdə;
5.6.3. Partiya üzvünün Azərbaycan Respublikasının vətəndaşlığına xitam verildikdə;
5.6.4. məhkəmənin qərarı ilə Partiya üzvünun fəaliyyət qabiliyyəti məhdudlaşdırıldıqda və ya fəaliyyət qabiliyyəti olmayan hesab edildikdə.
5.6.5. Partiyadan xaric olunduqda.
5.7. Partiya üzvü intizam tənbehi qaydasında Partiyadan Siyasi Şuranın üzvlərinin səs çoxluğu (açıq və ya gizli səsvermə yolu) ilə qəbul edilmiş qərarı ilə xaric oluna bilər. Partiyadan xaric olunma haqqında qərardan bir ay ərzində Mərkəzi Nəzarət-Təftiş Komissiyasına şikayət verilə bilər və həmin məsələyə həmin komissiyada 20 gün ərzində baxılır.
5.8. Partiyadan xaric olunma üçün aşağıdakılar əsas sayılır:
5.8.1. bu Nizamnamənin müddəalarını kobud pozan və Partiyanın nüfuzuna mühüm zərər vurmuş hərəkət və ya hərəkətsizlik etmək;
5.8.2. uzun müddət ərzində (bir ildən az olmayaraq) Partiyanın işində iştirak etməmək;
5.8.3. digər partiyaya üzv olmaq.
5.9. bu Nizamnamənin tələblərini pozan və ya Partiyanın nüfüzuna zərər vuran Partiya üzvünə aşağıdakı intizam tənbehlərindən biri tətbiq edilə bilər:
5.9.1. xəbərdarlıq;
5.9.2. töhmət;
5.9.3. Partiyada tutduğu seçkili vəzifədən azad etmək;
5.9.4. Partiyadan xaric etmək.
5.10. İntizam tənbeh tədbirləri yerli təşkilatların təqdimatı əsasında Siyasi Şuranın qərarı (sadə səs çoxluğu) ilə qəbul edilir.
5.11. Səlahiyyətli orqan tərəfindən üzvlükdən xaricedilmə haqqında qərarın verilməsi və ya üzvlükdən çıxarmağa dair ərizənin verilməsi üzvlükdən çıxma faktını Partiya tərəfindən qeydə almaq üçün əsasdır.
5.12. Partiya ilə üzvləri arasında yaranan mübahisələr bu Nizamnamədə nəzərdə tutulmuş partiyadaxili qaydada həll olunur. Partiyanın üzvü Partiya orqanlarının və struktur qurumlarının fəaliyyəti ilə bağlı, o cümlədən hərəkət və ya hərəkətsizliyindən şikayət edə bilər.
5.13. Yenidən təşkil olunan, ləğv edilən yerli təşkilatların üzvlərinin daha yaxın inzibati ərazi vahidlərində olan digər yerli təşkilatlara köçürülməsi məsələsi Siyasi Şuranın sadə səs çoxluğu ilə qəbul edilmiş qərarı əsasında həll edilir.
5.14. Partiya üzvlərinin reyestrini (adı, soyadı, atasının adı, doğulduğu tarix, qeydiyyat ünvanı, qeydiyyatda olduğu partiyanın yerli təşkilatı (olduğu halda) və əlaqə telefon nömrəsi göstərilməklə) aparır.
- PARTİYANIN ORQANLARI VƏ STRUKTUR QURUMLARI
6.1. Partiyanın Qurultayı, Sədri, Mərkəzi Şura, Siyasi Şura və Mərkəzi Nəzarət-Təftiş Komissiyası onun orqanlarıdır.
6.2. Partiyanın strukturuna onun müvafiq istiqamətlər üzrə məşvərətçi qurumları (qadınlar, gənclər və s. təşkilatlar), Partiyanın qərargahında cari işlərlə məşğul olmaq məqsədilə ayrıca bölmə (katiblik, aparat və s.), həmçinin yerli təşkilatlar daxildir.
- QURULTAY
7.1. Qurultay Partiyanın ali idarəetmə orqanıdır. Qurultay Partiyanın Mərkəzi Şurası və ya Siyasi Şurası tərəfindən beş ildə bir dəfədən az olmayaraq çağırılır. Partiyanın növbədənkənar Qurultayı Mərkəzi Şuranın və ya Siyasi Şuranın qərarı, səlahiyyətlərinə aid olan məsələlər çərçivəsində nəzarət orqanının, həmçinin partiya üzvlərinin ən azı üçdə iki hissəsinin Mərkəzi Şuraya və ya Siyasi Şuraya edilmiş müraciəti əsasında da çağırılır.
7.2. Qurultay nümayəndələri Siyasi Şura tərəfindən müəyyən olunmuş təmsilçilik normasına uyğun olaraq seçilirlər.
7.3. Qurultay nümayəndələrinin ən azı 2/3-i iştirak etdikdə səlahiyyətli sayılır. Qurultayın qərarları bu Nizamnamədə müəyyən edilmiş hallar istisna olmaqla, Qurultay nümayəndələrinin sadə səs çoxluğu (açıq və ya gizli səsvermə yolu) ilə qəbul edilir. Səsvermə forması Qurultay tərəfindən müəyyən edilir.
7.4. Qurultayın müstəsna səlahiyyətlərinə aşağıdakılar daxildir:
7.4.1. dövlət qeydiyyatına alındıqdan sonra Partiyanın yeni Nizamnaməsinin qəbul edilməsi, ona dəyişiklik edilməsi;
7.4.2. Partiya Sədrinin seçilməsi və səlahiyyətinə xitam verilməsi;
7.4.3. Mərkəzi Şuranın, Siyasi Şuranın, Mərkəzi Nəzarət-Təftiş Komissiyasının say tərkibinin müəyyənləşdirilməsi, Mərkəzi Şura, Siyasi Şura və Mərkəzi Nəzarət-Təftiş Komissiyası üzvlərinin seçilməsi və səlahiyyətlərinə xitam verilməsi;
7.4.4. Partiya Sədrinin, Mərkəzi Şura, Siyasi Şura və Mərkəzi Nəzarət-Təftiş Komissiyasının hesabatlarının dinlənilməsi;
7.4.5. Partiyanın fəaliyyətinin dayandırılması, yenidən təşkil olunması və ləğv edilməsi haqqında qərarın qəbul edilməsi;
7.5. bu Nizamnamənin 7.4.2 – 7.4.4-cü yarımbəndlərində göstərilən məsələlərə dair qərarlar sadə səs çoxluğu (açıq və ya gizli səsvermə yolu) ilə, 7.4.1 və 7.4.5-ci yarımbəndlərdə nəzərdə tutulmuş məsələlərə dair qərarlar isə 2/3 səs çoxluğu (açıq və ya gizli səsvermə yolu) ilə qəbul edilir.
- MƏRKƏZİ ŞURA
8.1. Mərkəzi Şura Partiyaya qurultaylararası dövrdə ümumi rəhbərliyi həyata keçirən kollegial idarəetmə orqanıdır.
8.2. Mərkəzi Şura Qurultay tərəfindən beş illik müddətə seçilir və onun say tərkibi Qurultay tərəfindən müəyyənləşdirilir. Mərkəzi Şuranın qərarları sadə səs çoxluğu ilə qəbul edilir.
8.3. Mərkəzi Şura növbəti və növbədənkənar qurultay çağırır, fəaliyyəti barədə qurultay qarşısında hesabat verir; Qurultayın və Partiyanın digər orqanlarının səlahiyyətlərinə aid olan məsələlər istisna olmaqla partiyadaxili məsələlər barədə qərarlar qəbul edir.
8.4. Azərbaycan Respublikasının Seçki Məcəlləsində nəzərdə tutulmuş qaydada Azərbaycan Respublikası Milli Məclisinə, Azərbaycan Respublikası Prezidentliyinə və yerli özünüidarəetmə orqanlarına seçkilərdə iştirak etməklə bağlı qərarlar qəbul edir.
8.5. Mərkəzi Şura iclasları 6 (altı) aydan gec olmayaraq Partiya Sədri tərəfindən çağırılır.
8.6. Mərkəzi Şuranın növbədənkənar iclasları Partiya sədrinin qərarı və ya Mərkəzi Şura üzvlərinin azı 1/3 hissəsinin müraciəti ilə keçirilə bilər. Mərkəzi Şura üzvlərinin yarıdan çoxunun iştirak etdiyi iclaslar səlahiyyətli sayılır.
- SİYASİ ŞURA
9.1. Siyasi Şura Partiyanın qurultayarası və Mərkəzi Şuranın iclaslararası dövründə fəaliyyət göstərərək ümumi rəhbərliyi həyata keçirən kollegial idarəetmə orqanıdır. Siyasi Şura Qurultay tərəfindən beş illik müddətə seçilir və onun say tərkibi Qurultay tərəfindən müəyyənləşdirilir.
9.2. Siyasi Şura:
9.2.1. qurultayarası dövrdə və Mərkəzi Şuranın iclaslararası dövründə Partiyaya ümumi rəhbərliyi həyata keçirir;
9.2.2. Partiyanın yeni proqramını qəbul edir, proqramında əlavə və dəyişikliklər edir;
9.2.3. növbəti və növbədənkənar Qurultay çağırır və Partiyanın yerli təşkilatlarının təmsilçilik normasını müəyyən edir;
9.2.4. öz fəaliyyəti barədə Qurultay qarşısında hesabat verir;
9.2.5. Partiyanın Mərkəzi Aparatının və yerli təşkilatlarının fəaliyyəti barədə Əsasnamələri təsdiq edir;
9.2.6. bu Nizamnaməyə uyğun olaraq Partiyanın yerli təşkilatlarının yaradılması, yenidən təşkil olunması, ləğv edilməsi haqqında qərarlar qəbul edir;
9.2.7. Partiyanın yerli təşkilatlarının sədrlərini və onların müavinlərini təsdiq edir və onların fəaliyyətinə nəzarəti həyata keçirir;
9.2.8. bu Nizamnamə ilə nəzərdə tutulmuş hallarda yerli təşkilatların sədrlərinin səlahiyyətlərinə vaxtından qabaq xitam verilməsi haqqında qərarlar qəbul edir;
9.2.9. Azərbaycan Respublikasının Seçki Məcəlləsində nəzərdə tutulmuş qaydada Azərbaycan Respublikası Milli Məclisinin, Azərbaycan Respublikası Prezidentinin və yerli özünüidarəetmə orqanlarının seçkiləri zamanı Partiyadan nümayəndələri (namizədləri) irəli sürür, onlarla bağlı qərarlar qəbul edir;
9.2.10. üzvlük biletinin formasını müəyyən edir;
9.2.11. üzvlük haqlarının ödənilməsinin qayda və məbləğini müəyyən edir;
9.2.12. ölkənin və ya ayrı-ayrı bölgələrin ictimai-siyasi həyatının mühüm məsələləri barədə Partiyanın mövqeyini əks etdirən bəyanatlar qəbul edir;
9.2.13. dövlət və yerli özünüidarəetmə orqanları, siyasi partiyalar, digər qeyri-kommersiya qurumları ilə qarşılıqlı əlaqə qurur;
9.2.14. Partiyanın başqa siyasi partiyalarla ittifaq və siyasi blok qurması barədə qərar qəbul edir.
9.2.15. Partiyanın çap mediasının təsis edilməsi və ya onda iştirakı barədə qərar qəbul edir;
9.2.16. bu Nizamnamə ilə müəyyən edilmiş səlahiyyətləri çərçivəsində partiyanın əmlakının və vəsaitlərinin idarə edilməsi üzrə qərarlar qəbul edir;
9.2.17. yerli təşkilatların qəbul etdiyi qərarları, bu nizamnaməyə və qanunvericiliyə uyğun olmadıqda ləğv edir;
9.2.18 bu nizamnamə ilə nəzərdə tutulmuş və ya Partiyanın digər orqanlarının səlahiyyətlərinə aid edilməyən məsələləri həll edir;
9.3. Bir qayda olaraq Siyasi Şuranın iclasları ayda bir dəfədən az olmayaraq çağırılır. Siyasi Şuranın növbədənkənar iclasları Partiya sədrinin qərarı və ya Siyasi Şura üzvlərinin azı 1/3 hissəsinin müraciəti ilə keçirilə bilər. Mərkəzi Aparata daxil olan qurumların rəhbərləri Siyasi Şuranın iclaslarında məşvərətçi səslə iştirak edə bilərlər.
9.4. Siyasi Şura üzvlərinin yarıdan çoxunun iştirak etdiyi iclaslar səlahiyyətli sayılır. Bu Nizamnamənin 9.2.2-ci və 9.2.6-cı yarımbəndində göstərilən məsələyə dair qərar 2/3 səs çoxluğu (açıq və ya gizli səsvermə yolu) ilə, digər yarımbəndlərdə nəzərdə tutulmuş məsələlərə dair qərarlar isə sadə səs çoxluğu (açıq və ya gizli səsvermə yolu) ilə qəbul edilir.
- SƏDR
10.1. Partiyanın Sədri Partiyanın ali seçkili vəzifəli şəxsi sayılır və Partiyanın fəaliyyətinə cari rəhbərliyi həyata keçirir. Partiyanın Qurultayında qeydə alınmış nümayəndələrin sadə səs çoxluğu ilə açıq və ya gizli səsvermə yolu ilə seçilir. Sədrin səlahiyyət müddəti 5 (beş) ildir. Səlahiyyət müddəti bitdikdə Partiyanın Sədri Qurultay tərəfindən yenidən seçilə bilər.
10.2. Partiya Sədrinin səlahiyyətlərinə onun Partiyada üzvlüyünə xitam verildikdə və ya üzvlük dayandırıldıqda, o könüllü olaraq səlahiyyətlərini icra etməkdən imtina etdikdə, Sədrin fəaliyyətinin bu Nizamnaməyə zidd olması və Partiyaya mühüm zərər gətirməsi faktı aşkarlanan halda Qurultay onun səlahiyyətlərinin icrasının dayandırılması haqqında qərar qəbul etdikdə xitam verilir.
10.3. Partiya Sədri:
10.3.1. Partiyanın fəaliyyətinə cari rəhbərliyi həyata keçirir, etibarnaməsiz Partiyanın adından hərəkət edir;
10.3.2. Partiyanı ölkə daxilində və xaricdə təmsil edir;
10.3.3. Partiyanın Mərkəzi və Siyasi Şurasının üzvü olaraq Mərkəzi Şuraya və Siyasi Şuraya rəhbərlik edir;
10.3.4. Qurultayı açır, Qurultaya hesabat verir, Mərkəzi Şuranın və Siyasi Şuranın iclaslarına sədrlik edir;
10.3.5. Partiyanın Mərkəzi Aparatını formalaşdırır;
10.3.6. bütövlükdə Partiyanın və onun ayrı-ayrı struktur bölmələri və orqanlarının təşkilati fəaliyyətini Azərbaycan Respublikası qanunvericiliyi və bu Nizamnamə çərçivəsində qaydaya salan daxili aktları razılaşdırır;
10.3.7. Azərbaycan Respublikasının Mülki Məcəlləsinə uyğun olaraq etibarnamələr verir, Partiya adından əlaqələr qurur, bu Nizamnamə ilə müəyyən edilmiş səlahiyyətləri çərçivəsində Partiyanın əmlak və vəsaitləri üzərində sərəncam verir;
10.3.8. Partiyanın Mərkəzi Şurasının, Siyasi Şurasının və Mərkəzi Nəzarət-Təftiş Komissiyasının növbədənkənar iclaslarını çağırır;
10.3.9. Partiyanın sədri özünün, Azərbaycan Respublikası Mülki Məcəlləsinin 49-1.1.3-cü və 49-1.1.5-ci maddələrində göstərilən şəxslərin bağlanılan əqdə münasibətdə aidiyyəti şəxs qismində çıxış etməsi, həmçinin həmin əqdlə əlaqədar öz maraqlarının xüsusiyyətləri (onun yaranması, həcmi və s.) barədə məlumatı Azərbaycan Respublikası Mülki Məcəlləsinin 49-1.6-cı maddəsi ilə müəyyən edilmiş qaydada Mərkəzi Nəzarət-Təftiş Komissiyasına təqdim edir.
10.4. Partiya rayon təşkilat sədrlərini təyin edir.
10.5. Partiya Sədri təmsil etdiyi Partiyanın mənafeləri üçün vəzifələrini yerinə yetirərkən vicdanla, peşəkar qaydada və məntiqlə hərəkət etmək, Partiyanın və onun bütün üzvlərinin maraqlarına sadiq olmaq və Partiyanın maraqlarını öz maraqlarından üstün tutmaq, ehtiyatlı olmaq, habelə qərarların qəbulu zamanı ədalətli və qərəzsiz olmağa borcludur. Partiya Sədri, bu vəzifələrin Partiyanın maraqlarına uyğun olaraq yerinə yetirilməsi üçün məsuliyyət daşıyır.
- MƏRKƏZİ NƏZARƏT-TƏFTİŞ KOMİSSİYASI
11.1. Partiyanın nəzarət-təftiş orqanı Qurultay tərəfindən 5 (beş) illik müddətə seçilən Mərkəzi Nəzarət-Təftiş Komissiyasıdır. Kollegial orqan olan Mərkəzi Nəzarət-Təftiş Komissiyasının say tərkibi Qurultay tərəfindən müəyyənləşdirilir.
11.2. Mərkəzi Nəzarət-Təftiş Komissiyası:
11.2.1. bu Nizamnamənin və Partiyanın proqramının tələblərinin, Partiya orqanlarının qərarlarının yerinə yetirilməsinə nəzarəti həyata keçirir;
11.2.2. partiyadaxili nizam-intizam və Partiyanın maliyyə məsələlərinə nəzarəti həyata keçirir;
11.2.3. Partiyanın maliyyə-təsərrüfat fəaliyyətini təftiş edir;
11.2.4. nəzarətin və təftişin nəticələri barədə Mərkəzi Şuraya və Siyasi Şuraya məlumat verir;
11.2.5. Qurultay qarşısında öz fəaliyyəti barəsində hesabat verir;
11.2.6. növbədənkənar Qurultayın çağırılması barədə Mərkəzi Şuraya və ya Siyasi Şuraya müraciət edir;
11.2.7. Partiyanın orqanlarının və strukturuna daxil olan qurumların (Qurultay istisna olmaqla) qərarlarının qüvvədə olan normativ hüquqi aktlara və nizamnaməyə uyğunluğunu bilavasitə yoxlayır, həmçinin onların hərəkət və ya hərəkətsizliyindən verilən şikayətlərə baxır;
11.3. Mərkəzi Nəzarət-Təftiş Komissiyası özünün ilk iclasında öz tərkibindən sədr və katibi seçir. Mərkəzi Nəzarət-Təftiş Komissiyasının iclasları 6 ayda bir dəfədən az olmayaraq keçirilir. Mərkəzi Nəzarət-Təftiş Komissiyasının növbədənkənar iclasları Partiya Sədrinin, Siyasi Şuranın və Mərkəzi Nəzarət-Təftiş Komissiyası üzvlərinin azı 1/3 hissəsinin tələbi ilə keçirilir.
11.4. Mərkəzi Nəzarət-Təftiş Komissiyasının iclaslarını Komissiyanın sədri və ya onun göstərişi ilə Komissiya üzvlərindən biri aparır.
11.5. üzvlərin ümumi sayının yarıdan çoxu iştirak etdikdə Mərkəzi Nəzarət-Təftiş Komissiyasının iclası səlahiyyətli sayılır, qərarlar iclasda iştirak edən Komissiya üzvlərinin sadə səs çoxluğu (açıq və ya gizli səsvermə yolu) ilə qəbul edilir.
11.6. Mərkəzi Nəzarət-Təftiş Komissiyası ehtiyac olduğu anda öz fəaliyyətinə mütəxəssisləri cəlb etmək hüququna malikdir.
11.7. Mərkəzi Nəzarət-Təftiş Komissiyasının sədri və üzvləri Partiyada digər vəzifəni, həmçinin Partiya Mərkəzi Aparatında vəzifə tuta bilməzlər.
- PARTİYANIN YERLİ TƏŞKİLATLARI
12.1. Yerli təşkilatlar Siyasi Şuranın qərarı ilə təsis olunur və onların səlahiyyətləri, təşkilati strukturu, eləcə də orqanlarının təşkili, qərarların qəbulu və səlahiyyət müddəti ilə bağlı məsələləri yerli təşkilatlar barədə Əsasnamə (bundan sonra – Əsasnamə) ilə tənzimlənir.
12.2. Yerli təşkilatlar Partiyanın Siyasi Şurası tərəfindən yaradılır və qeydiyyata alınırlar. Yerli təşkilatın adında Partiyanın adına və yaradıldığı müvafiq inzibati ərazi vahidinin adına istinad olunur.
12.3. Özəklər:
12.3.1. Özəklər azı 5 nəfərdən ibarət olmaqla yaşayış, yaxud iş yerlərinə aid ərazilər üzrə formalaşdırılır. Rayon (şəhər) təşkilatında qeydə alındıqdan sonra özəyin fəaliyyəti səlahiyyətli sayılır.
12.3.2. rəhbər orqanların qərar və göstərişlərini yerinə yetirir, Partiya Nizamnaməsini təbliğ edir, üzvlər qəbul edir, təklif və təşəbbüslərlə çıxış edir.
12.3.3. Özəyin rəhbər orqanı özək iclasıdır. Özəyə özək iclasında seçilmiş özək sədri rəhbərlik edir. Özək sədrinin səlahiyyət müddəti 5 (beş) ildir.
12.4. Rayon (şəhər) təşkilatı:
12.4.1. Rayon (şəhər) təşkilatı müvafiq inzibati ərazi vahidində partiya üzvlərinin yığıncağında (konfransda) təsis olunur və Siyasi Şurada qeydə alındıqdan sonra səlahiyyətli sayılır.
12.4.2. Rayon (şəhər) təşkilatı Partiyanın rəhbər orqanlarının qərar və göstərişlərinin icrasını təşkil edir.
12.4.3. Rayon (şəhər) təşkilatının rəhbər orqanı 5 (beş) ildə bir dəfədən az olmayaraq keçirilən ümumi yığıncaqdır (konfransdır). Rayon (şəhər) təşkilatının növbədənkənar ümumi yığıncağı (konfransı) partiya sədrinin sərəncamı yaxud Siyasi Şuranın qərarı və ya rayon (şəhər) təşkilatının üzvlərinin 1/3-nin tələbi ilə çağırılır.
12.4.4. Rayon (şəhər) təşkilatının ümumi yığıncağı (konfransı) rayon (şəhər) şurasının üzvlərinin sayını və tərkibini müəyyənləşdirir (özək sədrləri, seçilmiş nümayəndələr), rayon (şəhər) təşkilatının İdarə heyəti üzvlərinin sayını müəyyənləşdirir və seçir, rayon (şəhər) təşkilatının Nəzarət-təftiş qrupunu seçir.
12.4.5. Rayon (şəhər) təşkilatının sədri rayon (şəhər) təşkilatının fəaliyyətinə rəhbərlik edir, aparatı formalaşdırır, Rayon (şəhər) şurasına və İdarə heyətinə sədrlik edir. Rayon (şəhər) təşkilatının sədrinin səlahiyyət müddəti 5 (beş) ildir.
12.4.6. Rayon (şəhər) təşkilatı şurası ümumi yığıncaqlar (konfranslar) arası dövrdə rayon (şəhər) təşkilatının rəhbər orqanıdır. Rayon (şəhər) təşkilatı şurası İdarə heyətinin fəaliyyətini tənzimləyir, İdarə heyətində boş qalmış yerlərə yeni üzvlər seçir.
12.4.7. Rayon (şəhər) təşkilatının İdarə heyəti rayon (şəhər) təşkilatının cari fəaliyyətinə rəhbərlik edir. Rayon (şəhər) təşkilatının İdarə heyəti özəkləri təsdiq edir, üzvlük haqlarının və ianələrin toplanmasını təşkil edir, Azərbaycan Respublikasının Seçki Məcəlləsində nəzərdə tutulmuş qaydada Azərbaycan Respublikası Milli Məclisinin və yerli özünüidarəetmə orqanlarının seçkilərində namizədlərlə bağlı Partiyanın Siyasi Şurasına təkliflər verir.
12.4.8. Rayon (şəhər) təşkilatının Nəzarət qrupu rayon (şəhər) təşkilatının və üzvlərinin fəaliyyətinin Partiyanın Nizamnaməsinə uyğun olmasına nəzarət edir. Partiyanın üzvlərinə tətbiq edilən intizam tədbirləri ilə əlaqədar şikayətlərə baxır, müvafiq rəy verilməsinə dair qərar qəbul edir, rayon (şəhər) təşkilatının maliyyə işlərinə nəzarət edir. Rayon (şəhər) təşkilatı Nəzarət qrupunun səlahiyyət müddəti 5 (beş) ildir.
12.5. Partiyanın yerli təşkilatları ilə qarşılıqlı münasibətləri çərçivəsində həmin qurumlar Partiyanın yuxarı orqanlarının işində Qurultaya nümayəndə göndərmək, təkliflər, sənəd layihələri və digər materiallar vermək hüququna malikdirlər.
12.6. Yerli təşkilatlar öz fəaliyyətlərini Azərbaycan Respublikası qanunvericiliyi, bu Nizamnamə, Partiyanın rəhbər orqanlarının qərarları və Əsasnamə əsasında qururlar. Yerli təşkilatın statusu Azərbaycan Respublikasının Mülki Məcəlləsinə uyğun olaraq hüquqi şəxsin filialı statusuna bərabər tutulur.
12.7. Yerli təşkilatlar Azərbaycan Respublikasının qanunvericiliyinə, Nizamnaməyə və Əsasnaməyə zidd olan fəaliyyət həyata keçirdikdə Siyasi Şura Mərkəzi Nəzarət-Təftiş Komissiyasının rəyi əsasında həmin təşkilatları ləğv edir, yenidən təşkil edir, qərarlarının bu nizamnamə və qanunvericilik aktlarına uyğunluğunu yoxlayır, nizamnaməyə və qanunvericiliyə zidd olan qərarlarını ləğv edir.
12.8. Partiya ləğv olunduğu halda partiyanın yerli təşkilatları və digər qurumları da ləğv edilirlər.
- PARTİYANIN FƏALİYYƏTİNİN MADDİ TƏMİNAT MƏSƏLƏLƏRİ
13.1. Partiyanın fəaliyyəti aşağıdakı mənbələr hesabına maliyyələşir:
13.1.1. üzvlük haqqı;
13.1.2. ianə;
13.1.3. dövlət maliyyə yardımı;
13.1.4. çap mediasının təsis edilməsindən (çap mediasının iştirakçısı olmaqdan), ictimai-siyasi nəşrlərin, digər təbliğat və təşviqat materialların hazırlanması və satışından əldə edilən gəlir;
13.1.5. mülki hüquq müqavilələri üzrə, o cümlədən əmlakından istifadə və onun satılmasından, borcun (kreditin) alınmasından əldə edilən vəsait;
13.1.6. hüquq varisliyi və vərəsəlik yolu ilə əldə edilən əmlak;
13.1.7. qanunla qadağan olunmayan digər gəlirlər.
13.2. Partiyanın mülkiyyətində və istifadəsində onun fəaliyyətini təmin etmək üçün lazım olan qanunla qadağan olunmayan istənilən əmlak ola bilər.
13.3. Partiyanın mülkiyyətində sənaye müəssisələri, kooperativlər, həmçinin istehsal müəssisələri (bu Nizamnamənin 4.1.12-ci yarımbəndində nəzərə tutulmuş hallarda istisna olmaqla) ola bilməz.
13.4. Partiyanın əmlakından yalnız bu Nizamnamədən və Partiyanın proqramından irəli gələn məqsəd və hədəflərə nail olunması, habelə vəzifələrin həyata keçirilməsi üçün istifadə edilir.
13.5. Partiyanın üzvləri Partiyanın əmlakına münasibətdə hüquqlara malik deyillər.
13.6. Partiyanın sahibkarlıq fəaliyyətindən əldə etdiyi gəliri üzvləri arasında bölüşdürülmür və yalnız bu Nizamnamə ilə müəyyən edilmiş məqsədlər üçün istifadə edilir.
13.7. Partiyanın Azərbaycan Respublikasının hüdudlarından kənarda istənilən növ (hər növ maliyyə təşkilatları daxil olmaqla) hesab açması qadağandır.
13.8. Partiya pul vəsaitini yalnız milli valyutada və nağdsız qaydada bank hesabına köçürmə yolu ilə qəbul edir.
13.9. Partiya qəbul etdiyi ianələrin məbləği və ianəni vermiş şəxslər, həmçinin bu “Siyasi partiyalar haqqında” Azərbaycan Respublikası Qanununun 24.4.1-ci və 24.4.2-ci maddələrində nəzərdə tutulmuş hallar barədə məlumatı müvafiq qaydada Azərbaycan Respublikasının Mərkəzi Seçki Komissiyasına təqdim edir.
13.10. Partiya forması və məzmunu qanunvericiliklə müəyyən edilmiş illik maliyyə hesabatını auditor rəyi ilə birlikdə hər il aprel ayının 1-dən gec olmayaraq Azərbaycan Respublikasının Mərkəzi Seçki Komissiyasına təqdim edir və mediada dərc etdirir.
13.11. Partiya illik maliyyə hesabatını auditor rəyi ilə birlikdə mediada dərc etdirir.
13.12. Partiyada mühasibat uçotu “Mühasibat uçotu haqqında” Azərbaycan Respublikasının Qanununa uyğun olaraq aparılır.
- PARTİYANIN FƏALİYYƏTİNİN DAYANDIRILMASI VƏ BƏRPASI,
YENİDƏN TƏŞKİLİ VƏ LƏĞV EDİLMƏSİ
14.1. Partiya fəaliyyətini müvəqqəti dayandıra bilər. Bu barədə qərar (fəaliyyətin dayandırıldığı müddət dəqiq göstərilməklə) partiyanın qurultayı tərəfindən qəbul olunur.
14.2. Qurultayın keçirildiyi tarixdən 3 gün müddətində partiya qəbul olunmuş qərarı Azərbaycan Respublikasının Ədliyyə Nazirliyinə təqdim edir və partiyanın fəaliyyətinin dayandırılması barədə məlumatı mediada dərc etdirir və (və ya) yayımlayır.
14.3. Partiyanın fəaliyyəti bu barədə qurultayın qərarı qəbul edildiyi tarixdən dayandırılmış hesab olunur.
14.4. Partiyanın fəaliyyətinin dayandırıldığı dövrdə onun orqanlarının və struktur qurumlarının nizamnaməsində nəzərdə tutulmuş səlahiyyət müddətlərinin axımı dayandırılır.
14.5. Partiyanın fəaliyyətinin dayandırıldığı müddət bitdikdən sonra partiyanın fəaliyyəti bərpa olunmuş hesab olunur.
14.6. Partiyanın fəaliyyətinin bərpa olunduğu tarixdən 3 gün müddətində partiya bu barədə məlumatı mediada dərc etdirir və (və ya) yayımlayır.
14.7. Partiya bu Nizamnamə və qanunvericiliklə müəyyən edilmiş qaydada yenidən təşkil oluna bilər.
14.8. Partiya Qurultayda iştirak edən nümayəndələrin 2/3 səs çoxluğu (açıq və ya gizli səsvermə yolu) ilə qəbul edilmiş qərarı və yaxud Azərbaycan Respublikası qanunvericiliyinə uyğun olaraq məhkəmənin qərarı ilə ləğv oluna bilər. Partiya ləğv edildikdə onun borclarının ödənilməsindən sonra qalan əmlakı nizamnamədə göstərilmiş məqsədlərə, bu mümkün olmadıqda isə dövlət büdcəsinə yönəldilir.
14.9. Partiyanın əmlakı onun rəhbər orqanları və ya onun üzvləri arasında bölüşdürülə bilməz.
14.10. Partiyanın ləğvi Azərbaycan Respublikasının Mülki Məcəlləsinə və digər qanunvericilik aktlarına uyğun həyata keçirilir.
- DİGƏR ŞƏRTLƏR
15.1. Partiyanın fəaliyyəti ilə əlaqədar olan, lakin bu nizamnamə ilə tənzimlənməyən məsələlər Azərbaycan Respublikasının normativ hüquqi aktlarına uyğun olaraq tənzimlənir.
15.2. Nizamnaməyə edilmiş dəyişikliklər dövlət qeydiyyatına alındığı andan qüvvəyə minir.
15.3. Gələcəkdə bu nizamnamənin hər hansı müddəası qanunvericiliklə ziddiyyət təşkil edərsə, qanunvericiliyin müvafiq norması tətbiq edilir.