BAP sədri, millət vəkili Elşad Musayev: “Gediş haqqının artırılmasını düzgün hesab etmirəm”

“Gediş haqqının artırılmasını düzgün hesab etmirəm. İnsanların iqtisadi potensialını yaxşılaşdıraq, bundan sonra hansısa artımdan danışmaq olar. Yeni büdcə müzakirələri başlayır. Büdcəmizi qəbul edək, baxaq görək insanlara nə çatır, bundan sonra artım, yaxud azalma məsələsinə baxsınlar. Hökumətimiz yalnız artım barədə fikirləşməməlidir”.

Bu sözləri mətbuata açıqlamasında Böyük Azərbaycan Partiyasının (BAP) sədri, Milli Məclisin Əmək və sosial siyasət komitəsinin sədr müavini Elşad Musayev deyib.

Deputat bildirib ki, dünya təcrübəsində qiymətlərin artırılması Azərbaycana da müəyyən qədər təsir edir: “Çünki dünyadan təcrid deyilik. Azərbaycanda bahalaşmanı xarici və daxili faktorlarla əlaqələndirirlər. Dünyada hər hansı məhsulun qiyməti qalxırsa, Azərbaycana təsir edir, başa düşürük. Axı gediş haqqının buna aidiyyəti yoxdur. Bu sahədə ciddi islahatlara ehtiyac var. Özəlləşmə müəyyən sahələrdə daha geniş vüsət almalı, ciddi rəqabət olmalı, hökumətin nəqliyyat və gediş haqqı ilə bağlı ciddi planları olmalıdır ki, insanlar bu yükü qaldıra bilsinlər. Ayrı-ayrı sahələrdə qiymətlərin dəyişimi – artımı müşahidə olunur. Azalma halları isə, təəssüf ki, müşahidə olunmur. Kommunal xidmətlərdə, rüsumlarda artımlar olur. İndi də oktyabr ayının 1-dən etibarən gediş haqqı 60 qəpikdən başlayacaq. Bunu tətbiq etmək vacib deyildi. İlk növbədə, insanlarımızın rifahını yaxşılaşdırmalı, əməkhaqqını, büdcəyə daxil olan vəsaitlərimizin miqdarını artırmalıyıq. Bundan sonra hər şey paralel olmalıdır. Bilirsiniz ki, bizdə sosial sahələrə dövlət mütəmadi diqqət, qayğı göstərir, güzəştlər artır, amma qiymətlərin artması hökumətin göstərdiyi güzəştlərdən qat-qat artıqdır. Hökumətimiz bu sahədə ciddi fikirləşməlidir”.

BAP Mətbuat Xidməti