Böyük Azərbaycan Partiyası Anım Günü ilə bağlı bəyanat yaydı

1980-ci illərin axırlarından etibarən Ermənistanın Azərbaycan Respublikasına qarşı hərbi təcavüzü nəticəsində torpaqlarımızın 20 faizi işğal edildi. Bu hərbi təcavüz nəticəsində uşaqlar, qadınlar, qocalar da daxil olmaqla çoxlu sayda insanlarımız həlak oldu, 1 milyondan artıq soydaşımız öz torpaqlarından  didərgin düşdü.

Torpaqlarımızın işğaldan azad olunması ilə bağlı Birləşmiş Millətlər Təşkilatının Təhlükəsizlik Şurasının dörd qətnaməsini yerinə yetirməyən Ermənistanın hərbi-siyasi rəhbərliyi bütün hüquqi-siyasi xəbərdarlıqlara baxmayaraq, öz işğalçılıq siyasətini davam etdirirdi.

Nəhayət, 2020-ci il sentyabrın 27-də Azərbaycan dövləti özünün ərazi bütövlüyünün təmin edilməsi uğrunda haqq-ədalət savaşına qalxdı. Bununla da əks-hücum əməliyyatı başladı. İllərlə işğalçı düşmənə qarşı qisas hissini düşüncə və ruhunda yaşadan cəsur əsgər və zabitlərimiz Ali Baş Komandan İlham Əliyevin rəhbərliyi altında illərlə günahsız soydaşlarımızın qanını içən, Xocalı soyqırımı kimi neçə-neçə vəhşiliklər törədən, işğal olunan yurdumuzu, dini abidələrimizi, evlərimizi, sosial obyektlərimizi dağıdan, talan edən vandal düşmənə 44 gün ərzində qan qusdurdu, ordusunu diz çökdürdü.

Biz dövlət və millət olaraq həm Ermənistana, həm də işğalçı Ermənistanın arxasında duran, ona hər cür kömək göstərən məkrli qüvvələrə, iri güclərə qalib gəldik.

Yuxarıda göstərilənlərə əsasən, düşmən üzərində qələbə çalmağımızda öz canından keçən müqəddəs şəhidlərimizə Allahdan rəhmət diləyir,  qazilərimizə, qəhrəman ordu mənsublarımıza can sağlığı arzulayır, Böyük Azərbaycan Partiyası olaraq, 44 günlük Vətən müharibəsində olduğu kimi, bu gün də ümummilli problemlərimizin həll olunmasında  əlimizdən gələni etməyə, birliyə, bərabərliyə hazır olduğumuzu bəyan edirik.

BAP Mətbuat Xidməti